Jaagarɗo Malinaajo kalfinaaɗo Ndeenka, Saajo Kamara, habrii wonnde laamu hakkundeewu Mali heeɓi kaɓirɗe koonunkooje keewɗe iwrude leydi Siin, tawi heɓiraa ko he ngalu eyɓinanoongu konu ngu (budget militaire). O feññini kaan haala ko to karce militeer mo Kati, sara wuro Bamako.
Gila 2012 Mali woni ko he caɗeele mawɗe, dawrugol, kisal e reenaare. Caɗeele jibinɗe torlaaji mawɗi he yimɓe leydi ndii, teeŋti he leñol Fulɓe ngol leydi Mali joofii e woɗɓoniyaagal jihaadiyankooɓe.
Laamu kooninkooɓe ardiiɓe leydi ndii gila 2020 ngu, gila nde arii he jaappeere fooɗanii ko duñde Farayse boowal, e taƴondirde e mum he kala kuwtondiral, teeŋti bannge jonngu kooninkaagal (alliance militaire) ɓe lomtini ɗoon Risi. Ɗuum ene teeŋta he taƴondire keewɗe hakkunde Mali e Farayse baɗɗe tuggude 2022 haa hannde.
Laamu soldeteeɓe nguu heɓiino kaɓirɗe kooninkooje iwrude Risi he lewru Mbooy e lewru Juko 2022, caggal mum kadi ɓe keeɓii kaɓirɗe goɗɗe he lewru Siilo 2023. Ene jeyaa e kaɓirɗe ɗe ɓe keɓnoo he lewru Mbooy 2022, laaɗe diwooje keewɗe ummoraade Risi e doronaaji iwruɗi leydi Turki.
Ene jeyaa e kiɓirɗe ɗe ɓe keɓi he juuɗe Siin, he biyɗe Saajo Kamara, otooji belenndee, kamiyonji dusirɗi, otooji looɗe (ndiyam e kuɓɓam), ammbilaasuuji, njogitaaje e kaɓirɗe koonunkooje.
Laamu Mali, caggal nde yetti laamu Siin, ɓe kollitii wonnde e ɓena poola jihaadiyankooɓe ɓee. Rewindiiɓe fiyakuuji Mali, e boneeji gonɗi toon ɗii noon ene njedditi ɗuum. Nde tawnoo hay e balɗe jawtuɗe ɗee jihaadiyankooɓe ɓee ɓaɗii toon njanguuji muusɗi, he nder nokkuuji keewɗi ceertuɗi, kadi konu Mali dañii heen waasɓe pittaali mum en.
