Faraysenaajo mo iwdi Senegaalnaajo, woni dewbo ɗiɗaɓo mo filma mum jeyaa e naatɗi he pooɗondiral (en compétition) he koolol Cannes, caggal Atlanitics mo Mati Joop he 2019.
Banel e Adama haysinno ko pefol ne walla pentol ne ƴoogaa ko he pinal Fulɓe teeŋti e Fuuta Tooranaaɓe to Ramata askitinta iwdi mum. “Komi Faraysenaajo, sabu ko toon njibinaami kadi ko toon mawnumi, kono he nder galle amen min nehaa ko he pinal Fulɓe e aadaaji Fuutankooɓe.” Naɓokeyanke o wiy. “Komi Senegaalnaajo sabu ko toon ƴiiƴam am ummi, kadi ko ƴiiƴam waawi huunde fof” o wiy he mikro (faandu haala) RTS3, “wadde hannde ndariimi ɗoo ko lomtaade Afrik fof, sabu ene wiyee so Afriknaajo nawii poolgu, ko duunde ndee fof nawi poolgu. Ndariimi ɗoo hannde ko wuurnude pinal leñol am Fulɓe, sabu miɗo faarnoroo wonde Pullo, kadi Fuutanke e Senegaalnaajo. Ɗuum noon, huunde ndee way ko hono yahde ‘mondial’ walla kup Afrik nii, minen ne min ngari ko nawtude poolgu nguu cuuɗi men -Senegaal.”
Ñalnde Hoorebiir, nde filma oo holliraa ndee, o foɓɓanaama no feewi kanko e sate mawɗo ummiiɗo Senegaal, mo ene jeyaa e mum en Khady Mane e Mammadu Jallo, aywinanooɓe Banel e Aadama he nder Filma he.
Caggal feññinde iwdi e identite, njoorto Ramata Toulay, ko nde filma o wonata adunayankeejo, ɗumm woni kala ɗo dewbo waawi jeyeede he nder adunaaru he tawa ene waawi yiytaade heen hoore mum. “Yo o won dewbo Afghannaajo, Irannaajo walla Ameriknaajo. Wona sabu filma ko Afriknaajo e aktoor en ɓaleeɓe tan, raneeɓe mbaawaa yiytaade heen koye mum en. Ene waɗi filmaaji ɗi loowdi mum en ko adunayankeeji, hono no filma moƴƴinirtee Amerik kono tawa kala ɗo neɗɗo jeyaa ene waawi yiytaade heen hoore mum, oo ɗoo ne njoorto men ko yoo gooto kala yiyto heen hoore mum.”
