Dowlaaji Dentuɗi Amerik, hooreejo leydi ndi Joe Biden suɓiima ñalnde Naasaande bees ɓaleejo, Chrales Brown, ngam wonde hooreejo konuuji Amerik (Chairman of Joint Chiefs of staff). So batirdu ngenndi dowrowru ndu (senat) tabitinii ngoon suɓngo, ma Bees Charles Brown won ɓaleejo ɗiɗaɓo gardiiɗo konuuji Amerik caggal Bees Colin Powell. Kadi so ɗuum woni ma won laawol gadanol he nder daartol Amerik, hooreejo konuuji Amerik e jaagorɗo kalfinaaɗo ndeenka (defense) fof wonde ɓaleeɓe. Nde tawnoo he ooɗoo sahaa ko ɓaleejo, Lloyd Austin (Bees jahɗo fooftere), woni jaagorɗo Ameriknaajo kalfinaaɗo ndeenka.
Biden feeñini anniya mum suɓaade mo ko he kikiiɗe Naasaande to Galle Daneejo (White House) Rose Garden, ko huunde nde heewɓe njooɗtorinoo, kadi so tabitii ma lomto Bess Mark Milley, mo daawal mum jogori timmude he lewru Yarkomaa (Octobre).
Charles Brown ko Bees konuuji weeyo, (General armée de l’air), naatɗo he nder konu Amerik gila 1984. Ko o dokkaaɗo hurum toowɗo he nder laamu he sabu golle makko ngam ƴellitde karallaagal laaɗe diwooje konu Amerik haa mbaawi yahdude he yontannde, kam e arsanaal mum en nukileer, kono kadi e peeje makko ngam mahtaade konuuji Amerik mbele ene mbaawa faddaade ƴellitagol leydi Siin to bannge konu. Brown ene jeyaa kadi ɓe peeje mum en ko maantinɗe he ballal Pentagon he leydi Ukraine ngam waawa dartaade Risi.
Gen.Charles Quinton Brown Jr., jibinaa ko 1962, to wuro San Antonio he dowla Texas, he nder galle gaadoriiɗo kooninkaagal. Baaba makko Charles Brown Sr., ko koonunke wonnoo, waɗiino duuɓi 30 he nder konu Amerik haa woni Kolonel. Taaniko, Robert E. Brown waawnanooma he naatde he konu Amerik saanga wolde adunaare II mere, o felloyiino to bannge pasifik.
