Senegaalnaaɓe fof ene keppunoo nande ko hooreejo leydi Makki Sal jogori haalde he oo diskuur mo o ɓooyi fodande leydi Senegaal. Kono hayso toɓɓe ko fayti he hol ko jogori wonde rewam joljole baɗnooɗe he darorɗe lewru Korse (juin) ɗe ene woƴnoo yimɓe ɓee sanne ne, ko ɓurnoo wonde ngoƴa e kumpa Senegaalnaaɓe walla nii aduna oo fof ko hol ko hooreejo leydi ndii jogori haalde he ko toɗɗii jeyeede mo he suɓngooji 2024 ngam ƴamde happu tataɓo. He ndeen toɓɓere mawɗo leydi oo wiyi o fiɓaani ƴamtude lefol laamu ngol laawol tataɓol.
“Mi heɗtiima wonndude e teskuya kam e co’anɗe ɓernde heewɓe feññinɓe jinngol mum en he am ngam yo mi fooɗono lefol ngol ngam happu duuɓi joy ɗiɗaɓo, Ko sakkitii heen tan ko dental meer en e suɓaaɓe e falndeeji mum en hakke 512 he nder 601, ko jiidaa e ɗanniyankooɓe, rewɓe, pelle sukaaɓe, jannginooɓe, fannoriiɓe ɗemngal Arab, e seernaaɓe e mawɓe diine en, kanum en fof kollirii ene keblii he haɓeede ngam haa mi waawa jooɗtaade. Ɗuum fof e wayde noon pellital ngal ƴettumi ko waasde ƴamde lefol ngol hayo tawii ni doosɗe leydi ndii ene ndokki mi heen jojjannde.
Ɗuum miɗo anndi, ma bettu heewɓe ɓe nganndumi yiɗde mum en, hoolaare e korsa mum en e am. Ɓeen yiɗnooɓe yiyde miɗo jokki ardaade mahgol Senegaal, fuɗɗii ndi jogaade jeloode mum heɓtinirde he nder leyɗeele. Kono Senegaal diwii hoore am tan, ko ndi leydi heewndi waawɓe ardaade tawa ene nduña leydi ndii fayde he boli ɓamtaare.”
Caggal ɗuum hooreejo leydi ndii ruttaniima kadi toɓɓere happu tataɓo ndee e famminde hol ko haɗnoomo haalde heed gila ko ɓooyi, o wiy: “Gila ko ɓooyi yimɓe ɓee nana kaala, ene nduka he ndee ɗoo toɓɓere kono miin mi yiɗaano wonde dummbaaɗo he ndee ɗo toɓɓere ko duumi, haalde gila yontaani. Sabu golle am ko ardaade laamu nanondirngu, daraniingu ɓamtaare, teeŋti kadi ko he sahaa caɗtuɗo to bannge renndoyaagal e faggudu. He mbeñdi ɓeen yimɓe tuumooɓe mi wonnde miɗo suuɗi yiɗde ƴamtude lefol ngol ɓe, miin hakkille am ene laaɓi kadi miɗo siftora, mi yejjitaani ko kaalnoomi kadi mbinndumi. Gila miɗo ƴama lefol laamu ngol cilol ɗiɗamol he 2019, mi haaliino wonnde ko ngool wonata happu am cakkitiiɗo, kadi mi winndiino ɗum, mi haali ɗum kadi he nokkuuji keewɗi, miɗo filloo ɗum ɗoo joni ne kadi. Miɗo jogii hurum he ɓiyɓe Senegaalnaaɓe, heɗotooɓe ko kaalatmi, tarooɓe ko mbinndatmi, kadi miɗo anndi ko fotde am he daartol janngo; komi joom konngol kadii deenoowo konngol am.”
Caggal ɗuum hooreejo leydi ndii yetti ardinooɓe ɗum he jappeere laamu leydi Senegaal, Leopol Sedar Senngoor, Abdu Juuf e Abdullaay Wadda.
