So en tuugniima he lowre Seneweb,Idrisa Sek jaabiima laaɓnde he ko toɗɗi haalannde Hoorejo Makki Sall e pellital mum waasde jeyeede he suɓngooji payɗi. Kono kadi hooreejo lannda Rewmi/Ngenndi ndii, rokkii yiyannde mum he ko woni janngo dawrugol mawɗo lannda Pastef, Usmaan Sonko. He oo ɗoo tuma oon waawaa jeyeede he suɓngooji payɗi arde he Colte 2024, sabu ñaawooje paawɗe he dow makko sabu ko wolidnoomo e Maam Mbay Ñaŋ, e faweedemo bunnude yontannde (suka) hakkunde makko e Aji Raabi Saar lollirnde “Hafeere Sweet Beaute”.
“ Ñaawoore so taƴaama ene foti siineede hono no winndorii ni. He nder kala renndooji aduna o ko noon tan gollorte. ” Mawɗo Rewmi o woowli he tuma nde o hucciti e jaayndiyankooɓe Seneweb e 7tv, so en tuugniima he lowre seneweb.com.
Haa jooni o lollirɗo ndaamal kajor ene jokki: “ Yiɗde am ko yoo fof en mbaaw jeyeede he suɓngooji garooji ɗi, kono ko toɗɗii Usmaan Sonko, so tawii kuugal yanii he dow makko mbiyatmi tan ko yo o tommboyo suɓngooji gartoyooji sabu ko o suka tawo.” o teeŋtini. Idi wiy noon woni njoorto mum ko yoo suɓngooji payɗi ɗii ngon bellitiiɗi kadi udditaniiɗi mo woni kala, ɗuum woni kala jiɗɗo jeyeede e fooɗondirteeɓe lefol hooraagu leydi Senegaal.
Idrisa Sek, mo ngannduɗaa ene nodditoroo wonde hooreejo lunndiyankooɓe Senegaal, ene siftina tan wonnde ujunnaaje yimɓe Senegaalnaaɓe nana he nder dummbirɗe sabu kuule fawanoode he dum mum en, kadi o ɓeydi heen wonnde kala ñalawma Allah garɗo, ñaawooje ene njibina luure hay he nder leyɗeele mawɗe ko wayno Farayse walla Dowlaaji Dentuɗi, kono haɗataa ɗum en siineede.
Eɗen teskoo tan gila nde oon garnooɗo ɗiɗaɓo caggal Makki Sal he 2019, holliri pellital mum jeyeede he suɓngooji 2024, o seeraani e werlaade mawɗo lannda Pastef o kure, he mbeñdi lunndiyankooɓe heewɓe. Sikke alaa, hono Makki Sal ni, Sonko ene soklini Idrisa Sek.
