Laamu Risi tabitinii wonnde Yevgeny Prigozhin, hooreejo yoɓee-fella en Wagner pelɓondirnooɗo e konu Risi he lewru Korse yawtundu nduu, ene jeyanoo e wonnooɓe he laana ndiwoowa janka caggal wuro Musku ka.
Jaagorgal Risi toppitiingal jaawniiɗe wiy yimɓe sappo wonnooɓe he nder ndiwoowa kaa ɓe fof maayi.
Hedde waktu 17:00 GMT jaagorgal ngal habri wonnde laana ndiwoowa “Embraer Legacy 600” umminooka Musku ene fay Saint Petersburg saami. Wiyaama yimɓe sappo ene ngonnoo he laana he, tawa heen tato ko diwnooɓe ngonnoo. Haa jooni he biyɗe laamu ngu ɓalli heen yimɓe jeetato njiitaama.
Laamu Risi wiy ma ɓe taf goomu ngam rewindoo losko njangu laana ndiwoowa ka. Kono leyɗeele hiirnaange (oksidaa) ene tuumi laamɗo leydi Risi Walidemiir Putin wonnde ko kanum saabii maayde makko.
Yevgeny Prigozhin fuɗɗi anndeede e lollude ko nde konuuji makko yoɓee-fella en Wagner njanti e konu Risi ngam haɓde e Ukraine caggal nde Risi yani he Ukraine he lewru Colte 2022. Teeŋti e wolde Bakhmut ɓurnde juutde he heewde ƴiiƴam, he nder hare hakkunde Risi e Ukraine, tawi ardinoo ɗum walla mbiyen heedtinanoo he ndeen hare ko yimɓe makko, ɓe ene jeyaa e mum en ujjunnaaje haɓeteeɓe tawi kadi ko waɗboniyankooɓe sokanooɓe he nder dummbirɗe. O ƴettoyi ɗum en toon o naatni ɗum en he nder mooɓle Wagner. Sabu poolguuji ɗi mooɓle Wagner ndañi he ndeen hare saabii,Yevgeny Prigozhin waɗti huwtoraade layti-renndo ngam wasaade kadi e seyfitde konu leydi Risi, ɓe o takki wonnde ko naskaaɓe ɓe ngalaa baawal, walla nii o wiya ɓeen ko jamfiiɓe.
He lewru Korse (Juin) felliyankooɓe Wagner pilñotorii laamu Risi, ɓe mbiy e ɓe njanoyaa he Musku. Felliyankooɓe Wagner njaggi bannge worgo wuro Rostov-on-Don, ɓe pelli helikopteeruuji militeer en keewɗi ɓe mbari diwnooɓe (pilotaaji) mum en he tuma nde ɓe ngoni e yaɓɓande tiindaade Musku.
Hooreejo leydi Risi, Walidimir Putin noddiri baɗle maɓɓe ɗee e ngaan saanga, wonnde ko ɗum jamfa mawɗo kadi maɗum yoɓtore no muusi.
Kono caggal ɗuum maslahaa dogaa hakkunde Yevgeny Prigozhin mawɗo Wagner e hooreejo leydi Risi, Kremlin wiy ngam faddaade dufgol ƴiiƴam keewngol, o yimirii yoo Yevgeny Prigozhin e felliyankooɓe mum yoo njah paya Belarus, kadi ñaawooje waɗɓoniyankaagu paawanooɗe he dow maɓɓe ittaama. Yimɓe heewɓe, gila ndeen, ene njogii sikkitaare wonnde maa Putin woppirmo ni tan tawa alaa ko waɗimo. Hiñooɓe dawrugol heewɓe kadi ene taƴnii wonnde ɗum ɗoo ko jiirtingol ngol Puti yiɗi jeertinirde kala biyoowo ene jamfoo walla ene dikkoo ɗum.
