Muritani, lanndaaji ɗiɗi luutndo ɗi keɓtinaaka kuccondirii e jaayndiyankooɓe hanki, Mawnde 22, 9,2023 ngam eeraade laamu nguu yoo tottuɗum en ɗereeji mum laawɗingol (récépissé).
La Refondation pour une Action Globale (RAG) e Les Force Progressistes du Changement (FPC) ko waɗɓe ɗaɓɓaande mum en ngam wonde lanndaaji laawɗinaaɗi, kono laamu nana jooɗi heen ene sali tottude ɓe ɗereeji maɓɓe laawɗingol. Sabu ngantu waɗi Biram waawaani tawtoreede joɗnde ndee, ko Sammba Caam hooreejo FPC, jaabi laaɓnde jaayndiyankooɓe ɓe. O siftinii gila he fuɗɗoode wonnde ngal kuccondiral e jaayndiyankooɓe ko nanondiraangal hakkunde lanndaaji ɗiɗi ɗii, kadi kala ko haalaa ɗoon koko ɓamdaa.
Caggal de mawɗo lannda FPC o ƴetti konngol he ɗemngal Pulaar ngam jaɓɓaade kadi e yettude jaayndiyankooɓe tawtoraaɓe ɓee, o waɗtii ɗum kadi he ɗemngal Farayse. Ko caggal mum ɓe tarii eewnaango maɓɓe he ɗemngal Farayse.
Nde konngol ngol arti he mawɗo lannda FPC o, o hollii wonnde joɗndee ndee maa yeewte heen toɓɓe ɗiɗi, heen wootere woni ko yowitii he laawɗingol lanndaaji ɗii, kono ɓurnde himmude ndee woni ko fayti he guurdigal ɓiyɓe Muritaninaaɓe. O njaŋtiima ngonka leydi Muritani hannde, o hollitii caɗeele keewɗe teppuɗe Muritani, haɗi nanondiral hakkunde leñɗi ɗii. He biyɗe makko, hay seeɗe goodnooɗo he masaalaha hakkunde leñɗi leydi ndii laamu nguu bonnii ɗum. Hannde leƴɗi ɗii ko ceertuɗi. O woytiima kadi bongol jaŋde leydi ndi, nde o wiy saabii ɗum ko pellital laamu nguu fawde ɗemngal gootal tan he dow yimɓe ɓee fof. Ko sabu ɗeen caɗeele ɗe o jaŋtii waɗi, sukaaɓe leydi ndii fof natti ɗaminaade kuccam moƴƴam he nder leydi mum en; ɓe natti goongɗinɗe leydi, ko ɗuum waɗi hannde kamɓe fof e ɓena njalta leydii ndii e ɓe njiiloyoo to ɓe mbaawi dañde nguurndam moƴƴam.
O felii laamu mguu he waasde mum pellital e nuunɗal to bannge binnditaagol to, hayso tawii ɓe ndokki yamiroore yoo ɗum waɗire no haaniri ni eno ɓuri neworaade mbele mo woni kala ene daña fartaŋŋe winnditaade, kono teskuya maɓɓe e ko ɓe keɓi humpitaade alaa heen fof ko waɗa. So tawii ko nelaaɓe yoo mbaɗ gollal ngal ngoni ɓe ndewnaani laawol walla alaa, nokkuuji keewɗi kam e ɓe kumpitii ko hay batte, alaa ko waɗaa.
