Laamu koonunkooɓe jooɗiɓe he jappere to Wagadugu ɓee kabrii wonnde semmbe ndeenka e kisal leydi ndii daccinii feere enndunooɓe wiyde ene keɓta laamu Kapiteen Ibraahiima Tarawore. He tintinoore nde laamu koonunkooɓe ngu waɗi hanki Njeslaare 27,09, 23, ene habra koonunkooɓe dowrowɓe (officiers) e woɗɓe pewjiino wiyde ene keɓtira laamu nguu doole, ngadda fitina e jiiɓru he leydi he. He biyɗe kalfinaaɗo konngol laamu o, Rimtalba Jean Emmanuel Wedraago, ɓeen ofisee en e woɗɓe wonndunooɓe e mum en njaggaama, kadi won woɗɓe won ɓe yiyleede.
Caggal mum loskiyanke laamu oo ne habri wonnde yimɓe nayo nanngaama, ɗiɗo kadi ko dogɓe ene njiyle. Laamu koonunkooɓe nguu wiy maa waɗ kala feere mbele ko laaɓi ene dañee he nguu ɗoo fiyaaku. “Woy haame noon,” laamu soldateeɓe nguu wiy, “ Koonunkooɓe huniiɓe reende leydi mum en ene njana he majjere waynde hono ni.”
Caggal nde kabaaru o yalti, yimɓe heewɓe njaltii he mbeddaaji Wugadugu (Ouagadougou) ngam hollirde ene ngonani hooreejo leydi o kapiteen Ibraahiima Tarawore. Eɗen ciftina Ibraahima Tarawore kanum heɓirnoo jappeere ndee ko jaɓtirde laamu nguu doole (coup d’etat) he lewru Silto 2022, lewbi jeetati tan ko adii ɗuum ko koonunke kadi jaɓtunoo laamu he juuɗe siwil Roc Marc Kabore. keɓirnooɗo laamu rewrude he suɓngo.
Ɗum ɗoo waɗi ko balɗe seeɗa tan caggal nde jaagorɗo leydi Burkina Faso darii he dow tirbiin l’ONU wiy Farayse bone jaŋtii ɗum najoore.
Maa won duuɓi hannde, Burkina ene woni he caɗeele ndernderiije e ko ɓe mbiyata hare hakkunde laamu jihaadiyankooɓe. Ɗiin fitinaaji njooɓiima pittaali keewɗi, gila e koonunkooɓe haa e siwil en. Yimɓe heewɓe kadi ndogii koɗorɗe mum en, mooloyiima he nokkuuji goɗɗi.
