Hannde Dewo-hoore-biir (Alet)29 Yarkomaa (Septembre), conseil minicipal mo meeri Dakaar-Palaato innitiima gootol he kalluuji Ndakaaru ɓurɗi mawnude e lollude, woni Avenue Faidherbe, ɓe inniri ɗum hooreejo leydi Senegaal Toowa teddugal Hooreejo Makki Sal.
Ɗuum waɗaa ko he taweetoreede inne anndee en heewɓe gila e yimɓe laamu Senegaal, haa e mawɓe adaa wuro Ndakaaru, ko wayno Grand Seriñ en ɗiɗo ɓe, Papa Ibraahiima Jaañ e Abdullaay Moktaar Joop, yantude e dawriyankooɓe saare Ndakaaru heewɓe.
Innugal ngal waɗii mbummbaay mawɗo, laawol ngol fof ko maa heewi yimɓe. Banngeeji ɗiɗi kallu o, bannge heen kala ko maa wukkiti gori rewɓe ñaantiiɓe ene ɓoornii nannduɗi, ene njima ene ngama, ene mbeeyna araaray Senegaal walla won heen e mɓɓe natal hooreejo leydi o.
Nde hoorejo leydi ndii ari wonndude e jooma-suudu mum e mawɗo jaagorɗe o, ko Aliwun Ndooy meer mo Dakaar-palaato, mo ngannduɗaa ko kanum ƴetti pellital innirde hooreejo Makki Sal ngol laawol,ko kanum jaɓɓiiɓe, duusondiri e maɓɓe haa ɓe njetti to tirbin to. Ko adii nde hooreejo leydi o ŋabbata to tirbin too Ceerno Ibraahiima Jaañ (Grand Serigne de Dakar) tellii jaɓɓiimo. Caggal nde elimaan mawɗo o rokki duwaaw ko Ceerno (Grand Serigne) Abdullaay Mokhtaar Joop rokkaa konngol jaɓɓi hooreejo leydi o ko adii nde meer Aliwun Ndooy ɓamata konngol.
Caggal nde mawɗo leydi o ƴetti konngol o yetti mawɓe Lebunkooɓe ɓe, rewrude e inɗe mawɓe maɓɓe jooɗinooɓe ɗoon ɓe, woni Abdullaay Mokhtaar Joop e Papa Ibraahima Jaañ. O holli mbelemma makko e yiyde laawol mawngol wuro laamorgo ngoo ine waɗtii innde makko. “Yiyde innde mum ene jokkondiraa he saare, ko renndinde ɓanndu mum e wonki mum fof e daartol mum, hanki mum e janngo mum. Ɓeyɗi heen kadi Meeri Dakaar-Palaato nokku guurɗo, ko kanum woni ɓernde laamorgo men, kadi ko kanum woni nokku laamu, faggudu, njulaagu e ngaluuji (finance), kadi woni nehaande daartolyankeere mahanteeri yuɓɓo men.” Hooreejo leydi o, Makki Sal wiy.
Soppi Lekki ɗaɗi mum maayaani.
Ko daartol teskotoo he ngol ɗoo innirgol ko innde ittaande ndee e innde waɗtaande ɗoon nde. Louis Faidherbe, ko seneraal, kadi jiilatnooɗo dawrugol laamu Farayse he nder leydi Senegaal he sahaa koloñal. Kono seneraal walla guwerneer Faidherbe ene lolliri kadi wonde neɗɗo battunooɗo hakkille mum e leñol Fulɓe, Leñol ngol o wiynoo: “Ene jeyaa e leñɗi ɗi njiimɗen ɗii, leñol gootol ngol jogoraani jaɓde kalifaande men he dow mum en, te kadi ene hawri wonnde ngool leñol ene yaaji he nder wertaango njiimaandi men. Ko alaa e sago ummoɗen law, mbele mbaawen sardeɓe e renndindeɓe e leñɗi goɗɗi ɗi calaaki no feewi ɗi. Sabu ñalnde foo Fulɓe ndenti, e ɓe mbaawi fittude kala semmbe koloñaal he dow laawol maɓɓe. Wadde noon guwerneeruji men fof ene poti waɗde wonnde ko fotde mum en ngenndiyankoore (sardeɓe)”. Oon Federba, darinooɗo e sarde Fulɓe e helde doole mum en, so innde mum momtaama innde Hooreejo leydi Senegaal mo Allah hawridini e wonde Pullo waɗtaama ɗoon, waɗde wonii ko Fulɓe mbiyata koo: “ Soppi lekki ɗaɗi mum maayaani.”
