Woon hollirɓe ko kanndidaaji he suɓngooji 2024, kono ngonaa jaɓɓaaɓe he nder lunndo he, ko wayno Mimi Tuure e Decce Faal. Ɗuum ko konnguɗi Haamidu Caw hooreejo lannda Marche pour la Renaissance (MPR). He biyɗe Caw, “Nde Mimi Tuure woni he lannda APR nde, omo yahdunoo e politik ngonaa ɗo o. Kono hannde, sabu o natti nanondirde hooreejo leydi o, Makki Sal, waɗi omo yana e mum, te ko kanko wonno junngo mum ñaamo ngo joñiratnoo haɓdiiɓe mum dawrugol.
Haamidu Caw mo ngannduɗaa ko kollitɗo yiɗde mum ƴamde lefol ngardiigu Senegaal, haali ɗum ɗoo ko he yeewtere “Jeudis Citoyens” yuɓɓo ngam yeewtidde e hollitɓe kandidaayaagal mum mum en he suɓngooji payɗi, tawi yuɓɓini ɗum ko presence chretienne, ɗo Haamidu Caw bismanoo ngam hollirde huunde porograam mum, teeŋti ko yowitii he kisal, cellal walla safaara, ɗannule e wonɓe caggal leydi (dispora). “Mi goongɗinaani Mimi Tuure”, hooreejo lannda MPR o wiy. Kono ko hono noon kadi o wiy Decce Faal, hooreejo lannda Pari Republicain pour le progrès (PRP) kanndidaa mo kawtal “Dethie Fall 2024”. He jiyanɗe Haamidu Caw ko Decce Faal woni sabaabu Usmaan Sonko jaggeede e moofteede he dummbirdu.
“Sinno Decce Faal waɗiino golle mum hannde, Usmaan Sonko wonataano he nder dummbirdu. Usmaan Sonko noddiimo wiyi mo yo waylu liste ɗee, kono o waɗaani”, Caw habri. Haamidu Caw wiy ko haali ko ko ɗum yiyannde mum. “Ɓee ɗoo ɗiɗo mi alaa e maɓɓe hoolaare”.
