Doktoor Faatimata Kelli naatii he dartol Muritani, tawi kadi ko he sifaa jooɗɗo, kono kadi dokkuɗo ɗamaamuya moƴƴo wonande wonnduɓe he rafiiji ɓernde. Dr Faatimata Kelli wonii dewbo gadiiɗo oppirde ɓernde tawi ko kanum ɗowi gollal ngal haa gasi kadi Allah rewni ɗum laawol, Ko he gardagol makko e ballal kippu makko ñawndooɓe Muritaninaaɓe ɗuum golla he nder gooto Opitaaluuji (Ñawndordu) laamorgo ngoo, Nuwaksoot ñalnde 20/12/2023. Oo n suka dewbo mo oppiri yahrata tan ko he duuɓi 23, kono ɓernde mum koko nattunoo gollude e baawal hoore mum ko maa wallitoroo masiŋaaji.
He ballal Allah, Dr Fatimata Umar Kelli, daɗndii oon suka dewbo mo nguurnadam ko he kaayaa-mbeeya wonno, te kadi wona doktoor oppiroowo fof suusi waartude ɓernde, nde tawno ene heewi semmu.
Dr Kelli, ko ceemeedo tokooso jahroowo he duuɓi 33. O jibinaa ko he 1990 to Saare Ndoogu he nder diiwal Baraknaa. O heblaa ko to Duɗal Jaaɓi-haaɗtirde Seek Anta Joop to Ndakaaru he nder leydi Senegaal. Caggal mum o ɓeyditii to Jaaɓi-haaɗtirde Al-Asriya to Nuwaksoot. O heɓi seedanfaagu makko ko he 2016. Ko o fanniyanke he baartugol ɓerɗe (chirurgienne cardio-vasculaire), Eɗen ciftina baartugol ɓernde gadanol he nder Muritani waɗanoo tan ko he 2012.
