Hooreejo lannda fusaaka, Pastef, kadi lunndiyanke ɓurɗo soklinde laamu Senegaal sabu ŋatre mum, Usmaan Sonko jeyetaake he suɓngooji hooraagu Senegaal 2024. Ko ngaal pellital ñaawooɓe suudu doosɗe ƴetti, caggal nde ɓe kiñi ɗereeji makko (dossier) sabu ŋakkeende won e kaayitaaji. He nder geɗe 9 laaɓndaaɗe ɗee, o addi heen tan ko 7. O addaani doggol makko deforɓe (parrainage) kadi o naatnaani jukunnde makko 30 miliyoŋ cfa, ko ɗuum waɗi o waɗdaani he ɗereeji makko kaayitol kolliroowol jukunnde ngol o fotnoo heɓde to kees jukunndeji (Caisse des dépôts et consignations -Cdc).
Ñalnde Mawnde (Aljumaa) 5 Siilo, ñaawirdu dowrowru Senegaal, kanum ne tabitinii ñaawoore fawanoonde he makko he lewru Duujal (Mai) he ko yowitii hakkunde makko e Maam Mbay Ñaŋ. Ngool tibitingol kanum e hoore mum ene haɗa Usmaan Sonko jojjannde waawde jeyeede he suɓngooji hooraagu leydi Senegaal payɗi ardi he lewru Colte 2024.
Huunde haawniide noon ko elle yimɓe lannda pusaaka kaa, kelblaninooka wonnde ko waynii ene waawi yannde he dow hooreejo maɓɓe o. Sabu ɗo yahratee hannde he keblungal suɓngooji ɗoo, ene laaɓi yimɓe Pastef kolliraani ene njogii feere laaɓtunde daɗɗanoonde ngam jooɗtoraade wonnde Usmaan Sonko ene waawi waasde jeyeede he suɓngooji payɗi arde ɗi, hayso tawii ndeen niwre ene weeyatnoo he dow makko ɗi lebbi fof. Maa won bettere mawnde so tawii Usmaan Sonko ronki waawde jeyeede he ɗii ɗoo suɓngooji kadi alaa goɗɗo mo ɓe nanondiri ɓe cuɓii heɓe ngemmba ɗum jokka darnde maɓɓe e haɓanaade yiyannde maɓɓe dawrugol ngol ɓe noddirta “eɓɓaande” (Projet Pastef).
He lewru Jolal Sadikh Top waɗiino haalannde he innde Usmaan Sonko, wiy oon yamirii yoo Basiiru Jomay Fay won ndesaari (Plan B) lannda Pastef. Ɗuum woni yo o won kanndidaa maɓɓe so Usmaan Sonko heɓaaki. Kono to baɗle, yimɓe heewɓe ene njedditii wonnde ndeen feere ko ɓamdaande, haaldaa he nder yuɓɓo lanndakaa ene nanondiraa. Ko adii fof, oon Basiiru Jomay Fay, hono no Sonko ni, woni ko he dummbirdu, kadi o wiyaa ko yo ɗaɓɓoy parenaas ɓiyɓe leydi (parrainage citoyen), tawa so Usmaan yaltii, kanum ƴetta parenaas suɓaaɓe (parrainage des élus). Hannde oon Basiiru Jomay, ƴamal mum koko lofii tawo sabu waasde timminde sarɗiiji laaɓndaaɗi ɗii, teeŋti to bannge paaree’ en. Ko ɓuri haawnaade fof ko he tuma nde kanndidaa Pastef o, Basiiru Jomaym woni he sikki sakka, dipiteeɓe Pastef kanum en mballi Habib Sih no ɓenniri.
