Lunndiyanke kiiɗɗo o, Mammadu Wuuri Bah, ɓurɗo lollirde Bah Oury, nomaama hooreejo jaagorɗe, tawa ko he dekkere mo siifi ɗum, hooreeje laamu ƴaaŋal kadi mawɗo diɗɗal koonunkooɓe o Bees Semmbe konuuji Maamadi Dummbuya, caggal nde o, yaafii Dr Bernard Gumu gonnooɗo mawɗo jaagorɓe kanum he diɗɗal mum.
Ko hannde Naasaande 29- 02-24, mawɗoo jaagorɗe keso o ƴetti gollal mum he tawtoreede huunde he terɗe diɗɗal kooninkooɓe CNRD (comité national du rassemblement pour le développement), e hoolaaɓe kuuɓal jaagorɗe ɗee he gardagol jaagorɗo kadi koolaaɗo kuuɓal hooraagu Repobilik o (Secrétaire Général de la Présidence de la République) Général de Brigade Amara Kamara, e Jaagorɗo kadi mawɗo kabine Jiba Jakite.
Ngal ɗoo piilngal ari ko he tuma nde ɓiyɓe Laginenaaɓe heewɓe ndarii ngam hollirde mettere mum en he nguu laamu ƴaaŋal wonngu he juuɗe kooninkooɓe.
He ñalnde Aaɓnde (Altine) nde yimɓe ɗiɗo maayii he puɓondiral baɗnongal hakkunde alkateeɓe e seppooɓe nootinooɓe he noddaandu pelle sandikaaje eerinooɗe seppooji he nder leydi ndii kala ngam laaɓndaade laamu nguu yoo ustu cogguuji nguura ka.
Mammadu Wuuri Bah eeriima sandikaaji ɗii yoo ndartin seppooji ɗii gerewaaji ɗii, ɓe njeewtida he taaɓe ɗe ɓe mbaawi waɗe ngam safruuɗi tiiɗallaaji e caɗeele leydi ndii wonndi ɗi.
Oo ɗoo fagguduyanke to bannge heblo, ene ɗaminaa he mum, gaagaa tafde guwarnamaa keso, kono kadi addude pewje ɗe ene mballa miliyoŋaaji Laginenaaɓe yaltude he tiiɗallaaji faggudu ɗi leydi ndii woni hannde ɗi.
Mammadu Wuuri Bah ko ɓooyɗo anndeede he nder dawrugol Lagine, gila he 90. He 1991 o tafi lannda lunndiyankeejo ɓurnooɗo teskeede he ngaan saanga, woni UFDG, mo o riiwaa he mum caggal ɗuum. O ardoyii kadi lannda URDG. He 2007 o nomaa jaagorɗo ngam beldital ngenndi.
He 2011, sabu takkeede mo he jeyeede njangu to galle Alfaa Konnde, o dogi o mooloyii Farayse fotde duuɓi nay, haa e 2016 Hooreejo leydi o yaafiimo o arti Lagine.
Guinee ene ɗaminaa maa waɗ suɓngooji ɗoo he lewbi sappo, ngam artirde laamunguu he juuɗe siwil en, tuugnaade he ko laamu ƴaaŋeewu nguu e CEDEAO nanondirnoo ko.
Pooɗee-nduure mawɗo seeraani e waɗde, hakkunde laamu nguu e lunndongoo, he ko yowitii baɗgol ɗiin suɓngooji, kono ene yaakooraa sabu karallaagal e ñeeñal dawrugol ngal Bah Wuuri anndiraangal, maa o waaw wallude he safrude caɗeele dawrugol ɗe leyndi ndii woni he mum ɗe kanum he tiiɗallaaji faggudu ɗi ɓiyɓe Lagine nguurata hannde ɗee.
