PDS he mbaydi mum wonde tergal he kawtal Wallu, hollirii caggal nde jooɗodii e sate jokkondiral mo kawtal Yewwi nelnoo, e gardogol Habib Sih, wonnde ɓe mbaawa taweede he kawral lunndiyankooɓe ngam diisnondiral (Plateforme de l’opposition) so tawii Aminata Tuure ene heen jeya.
Lannda Abdullay Wadda o, wiy renndataa e Mimi Tuure hare lunndiyankooɓe. Sabu hakke duuɓi sappo e goo, laamu Benno Bokk Yakaar, Aminata Tuure ene jeyanoo e yimɓe wonɓe sabaabu jahrugol caggal laamu goongirantaagal (l’etat de droit), demokaraasi, kadi e baasal keptingal Senegaalnaaɓe hanndengal.
“Aminata Tuure woniino jaagorɗo toppitiiɗo ñaawoore, hooreejo jaagorɗe, kadi hooreejo CESE (Conseil Economique, Social et Environnemental), hakke duuɓi sappo, ko kanko wonnoo tergal ɗiɗaɓal nguu laamu APR wonngu he gasirɗe mum. Waawa jaɓeede oon Aminata Tuure gonnoɗo Jaagorɗo kalfinaaɗo ñaawoore, kono alaano hoolaare e ñaawooɓe Senegaalnaaɓe CREI (Cour de Répression de l’Enrichissement illicite) , kono tafi ko goomu diisnondirɗo tawi ko ñaawooɓe jananiyankooɓe yahɓe fooftere, teeŋti e Faraysenaaɓe, ɓe o jooɗdotonoo to biro makko ngam ha o ɓura waawde yaɓɓude jojjannde kanndidaa PDS, oon wiya hannde ene soodtoo elle no dawriyanke garɗo keso pul ni, ene rennda hare e lunndiyankooɓe goongiray-goonga.” Lannda Abdullay Wadda o hujjikinorii he bayyinaango mum en.
He balɗe jawtuɗe ɗee Aminata Tuure kanum ne yaltidii e lay goɗɗo, He biyɗe makko, lannda Abdullaay Wadda woni ko e yeewtere hakkunde mum e hooreejo leydi o, Makki Sall, ko ɗuum waɗi lannda baba mum Karim yiɗaa ñiŋde Makki Sall, nde tawnoo ɓe ngoni ko he yeewtere suuɗiinde.
Jaaynde Sud Quotidien ne, haali ko ɓe inniri “Jeu trouble du PDS”. Jaaynde ndee laaɓndiima mbele lannda Wadda o yiɗaani daccinde ummannde kawral lunndiyankooɓe ngal, ngal ngannduɗaa miijo soseede mum ummorii ko he Yewwi Askan Wi?
