Ñalnde Mawnde (Aljuma) 21 Morso (Juillet) 2023, wonnoo ñalawma gadano Fuguyanke Argentinajoo o Lionel Messi, fettude he kippu mum keso o, woni Inter Miami. Ko he dingiral DRV PNK Stadium keewngal haa wukkiti ujunnaaji yimɓe ngari ngam yeeɓde ndee hoodere jaayre fugu koyngel winndere. Ene jeyaa e tawetenooɓe he dingiral DRV PNK Stadium koode Amerik Jalbuɗe ko wayno LeBron James ɓurɗo heewde loggi (mbattuuji) ɗi naatni he nder NBA mo ngannduɗaa yiyaama ene jaɓɓondira e Messi ko adii nde fijo (match) ngoo fuɗɗoto. Serena Wialliams, dewbo pijoow Tennis lolluɗo o, kanum ne heɓii naatde he dingaral he ko adii nde Messi naatnata loggol mum. Ko hono noon kadi hoodere Reality TV nanaaɗo he winndere o, Kim Kardashian ene jeyaa e adiiɓe naatde dingiral ngal. Tua Tugovaila pettanoowo Mami Dolphins woni Kippu Miami baɗoowo Fugu Amerik o e Tom Brady en fof ene njeyanoo he arɓe nootitaade to dingiral DRV PNK Stadium.
Tawi saabi ɗum ɗoo fof ko gargol Lionel Messi he Kippu Miami o, woni Inter Miami. Fuguyanke Argentina o, Lionel Messi, diwii tan hoodere kono ko o lewru walla nii mbiyen naange, nde tawnoo adunaaru ndu haa waɗi feggere alaa ɗo inndi makko majjaa. Kala ɗo njahɗaa hannde e leyɗee adunaaru ɗe, ma a yiy suka ene ɓoorni jersey (mayoo) Lionel Messi, foti ko tonngoode 10 mo Barcelona walla ko 30 mo Paris St. Germin.
Amerik ko leydi Star en (koode) kadi yiɗɓe star en. Hayso Messi naati he fijo hee ko maa ndaari gasde ne, naatgol makko dillinii yimɓe ɓee teeŋti e nde o naatni loggol he silmaaji 94, gaddanngol Maimi hawde he ngal kawrital.
Caggal kariyeer juutɗo dokkuɗo Lionel Messi kala teddungal e heɓde kala ko ene fooɗondirteno he Fugubal, sikke alaa e jawdi kadi keewndi, ma neɗɗo laaɓndo hol ko waɗi Messi ene suɓoo gaynirde kariyeer mum to Dowlaaji Dentuɗi? So goonga Amerik ko leydi ngoowndi daɗde e ardaade he kala fannuuji, kono fugubal noon alaa heen. So tawno ko sabu kaalis keewɗo yaama ma o yahatno Arabi Sawdii to kolob maɓɓe Al-Hilal fodani Messi ene yoɓa ɗum fotde $440 miliyoŋ dolaar hitaande so jaɓii arde fetta toon.
Jawdi walla nii heɓde teddule toowɗe he fugubal wonaa ɗuum nawi Messi Dowlaaji Dentuɗi, kono yiɗde wuurnude fugubal ɓeydude daraja mum he nder Anerik addani Messi suɓaade Miami, hono no Pele en David Beckham en ko adiimo, cuɓorinoo arde Miami walla Los Angeles Galaxy ngam fettude he MLS (Major League Soccer). Fayndaare ndee ko naatnude Futbal he ɓerɗe Ameriknaaɓe nde tawnoo kala ko ɓe njiɗi ene jaraniɓe huunde fof. Eɓe mbaawi mawninde kadi kala ko yimɓe leydi ndii njiɗi jooma jawɗeele en ɓee ene keblii waɗde heen juuɗe mum e jawɗeele mum en ngam duusede ɗum haa waawa ƴellitaade. Nde tawnoo Amerik ko leydi Kapitalism, kala ko yimɓe kuccani wontata ko oogirɗe ngalu, ko huunde faggorde kadi wallitoore e ɓamtaare faggudu leydi ndii.
Fugubal (soccer) ene woɗɗi tawo wonde cotalɓalli jiɗangal hono no spooruuji ɗi Ameriknaaɓe ɓee ngoowi ɗii, woni Baseball, Basketball, walla ko ɓe noddirta American Football ko, kono MLS nana fuɗɗo nootiteede no feewi he nder won e nokkuji he nder leydi he. Garaangal fettooɓe lolluɓe he Adunaaru ndu kala ɓe, ko wayno Lionel Messi ene addana yimɓe waɗtude hakkille e ngal ɗoo coftalɓalli, kadi e yiɗirde ɗum seeɗa-seeɗa.
