Duuɓi 50 caggal maayde filosof, dartiyanke Senegaalnaajo, Umaar Bolonndee Joop he nder dummbirde, fotde 50 neɗɗo, gila e dawriyankooɓe, toowaganndal’en, e naalankooɓe Senegaalnaaɓe e woɗɓe jeyaaɓe he leyɗeele keewɗe ceertuɗe, ciifii ɗaɓɓaande eeraago (ene tawee ɗo) fayde he laamu Senegaal ngam doosiyee makko uddite.
Ene jeyaa e ko semmbino ngoon eeraago, he biyɗe ngaal dental, seedanfaagu ngu ñaawoowo kalfinanooɗo losko ngoo hee ngaan saanga o, e mahtagol 3D waktuuji battindiiɗi he nguurndam dartiyanke o, yanti kadi e kabaruuji kesi ɗi gollondiratnooɗo e Hooreejo Lewopol Sedar Senngoor habri.
Sabaabu maayde Umar Bolonndee Joop, caŋkiiɗo ñalnde 11 Duujal 1973 to dummbirde Gore, haa jooni ene ŋakki laaɓde, walla boom mbiyen ko ɗuum won e yimɓe njogitii. Haalande lawakeere ndee he ngaan saanga holliri ko o bartiiɗo he nder suudu ɗo o dummba noo ɗo, kono baaba makko kanum ene yeddunoo ɗuum gila heen ngaan saanga.
Ñalnde jeegom Korse (Juin) 1973, Doktoor Ibraahiima Bolonndee Joop, Portii pelente ngam “ piile e gaañanɗe he dow teyaaɗe haa saabi maayde, hayso wona ɗuum faandorano” e “ waasde wallude neɗɗo gonɗo he tilfaade (non-assistanance a personne en danger)” Ndeke so en paami, kanko doktoor Bolonndee Joop o goongɗini he ngaan saanga ko wonnde ɓiy makko oo ko piggal wariɗum, kono wonaa bartiiɗo, kono ñalnde 12 Korse 1975, ñaawoowo mo Tirbinaal Koreksonel mo Ndakaaru hollirii alaa hattan he ndeen ñaawoore.
Gila ndeen pelle nannanɓe ɗee (les mouvements de gauch), gila he nder Senegaal haa e caggal leydi, ene njokki daraade ngam yoo losko nuunɗungo waɗe mbele sabaabu maayde makko ene laɓɓine. Ko ɓooyaani koo Juge Mustapfaa Tuure ñaawoowo kalfinanooɗo losko ngoo he ngaan saanga holliraama he filam mo tiitoonde mum woni : “Omar Blondin Diop un Révolté”, mo yuɓɓini ɗum Jeydi Jiggo, omo wiya caggal nde ɓe mahti baɗe ɗee he nder nokku hee, fiɓnde makko wonno ko sellataa wona Umar ko bartiiɗo. Kono oon ñaawoowo hannde wuurani he dow leydi, hayso tawii haala makko koko filmaa.
Omar Bolondee Joop ko sagata feeloyaŋke-filosof senegaalnaajo luutndinooɗo laamu hooreejo Lewopool Sedaar Seengor, yiytaa ene hawri e lajal, tawi omo sokanoo he kasoo to Duunde Gore too. Ko ene wona jooni duuɓi cappanɗe Joy, yiyannde laamu nde, so wiyde ko o bartiiɗoɗo waylaaki, kono heewɓe hakkillaaji mum en ene njeddi ɗuum. Ɓeen ngoongɗini tan ko wonnde ngoonga oo ko o baraaɗo. E hono no jaŋtoriiɗum Foloriyan Bobeen he nder winndannde mum yaajniinde, “OMAR BOLONNDEE JOOP: NGAMA WAYLITAARE AFRIKNAARE“, yaltunde he lowre binndipulaar.com
