Ko ngol ɗoo woni bulet Muritani hawde he nder kuppu Afrik mo ngenndiiji. Kono kadi ɓeydii welnude ngol ɗoo kawgol fof, ko wonde ɓe piy ko Aljeri ngootiri e leyɗeele Afrik ɓurɗe waawde fugu. Ngol ɗoo kawgol maa rokku Muritani fartaŋŋe waawde yahde daawal ɗiɗamal fijo ngoo, kono Aljeri kam saawi tekke mum waaltoyi Aljeri, kadi ɓe kooti ko ɓe kawaani hay laawol gootol he nder o Kuppu Afrik mo Ngenndiiji.
Naatni loggol kippu Muritani ko Mohamed Dellahi he saanga hojomaaji (silmaaji) 37, hayso tawii Aljeri ɓaarnii laabi jonɗi ne, ko Muritani ɗeɓi naatnude kadi loggol goɗngol nde Ibnu Bah luuñii ɗo ɓadii kono yani he palal.
Jamel Belmadi, kebloowo Aljerinaaɓe o, wiy ene jogii geɗe ɗe waawaa famminde, sabu ɓe ndonkii naatnude hayso tawii e ɓe njoginoo pewje moƴƴe e fijo haralleewo. “Ɗum ɗoo ko kaawisaaji fugu pettel. Sinno min ɓaarnataano, ko min monanooɓe, ko ɓe min mbaddata ɓee tan ɓaarnata, walla e min ndacca ko heewi ma wiyeteno ene jogii e senngooji kippu amen ɗi moƴƴaani, kono alaa e ɗuum fof ko woodi he nder macce ɗe min petti ɗee, wadde noon ɗum ko huunde ndmi waawaa faamnude. Ngol waɗti cili ɗiɗi e min ngara CAN e min njooɗoo ko Fugu Pettel waynoon.”
Ɗuum ko welo welo jam tan! So Guɓal fojiyaŋkooɓe Muritani foolii Aljerinaaɓe.
Ina woodnoo kaangaaɗo gooto wuro Suwoyna ina wiyee Sammba Yerel Soh, o mbo joginoo rajoyel so a naamndiima mo hol ko ngel yimata, o wiymaa: “Ngel yimata ko welo welo jam tan. ”
Ɗum ɗoo ne noon, ko welo welo jam tan.
Eɗen ndennda e maɓɓe weltaare sanne!