He fannuuji keewɗi, ñalnde Hoore-biir (asewere) hannde ndee ko ñalngu teskinngu he nder daartol Dowlaaji Dentuɗi Amerik.
Leydi ndii mawninii ñalngu bayyinaango jeytaare mum hono no aadorii waɗde hitaande kala. Ɓe mawninirii ɗum pijirlooji keewɗi, ko wayno kawgel ɓuraa waawde ñaamde hotdog, fijooji baseball walla pijirlooji naalankooɓe mawɓe yantude e paɗɗule dulɓitaali jeynge (fireworks) defileeji (hayso Amerik aadoraaki waɗde defile militeereeɓe e yaltinde kaɓirɗe wold) he nder nokkuuji keewɗi he nder leydi hee, teeŋti he Washington e New York.
Kono kadi nguu ɗoo ñalngu jeytaare ina seerti, sibu ko ñalngu mawngu leydi ndii : hitaande 250ɓiire gila Amerik sosaa. Kadi ina jeyaa e ñalɗi jeytaare ɓurɗi heewde politik fotde ko hakkillaaji teskotoo.
Hooreejo leydi ndii, hono Donald Trump, ina foti haalde e nder jamma oo, ummoraade e nokku biyeteeɗo National Mall to Washington, ko adii puɗɗagol kollirgol dulɓitaali (fireworks) ɗi ene tijja maa won dulɓitaali ɓurɗi mawnude he kala meeɗnooɗi yiyeede he nder winndere he. Ko ene ɓura 850,000 ɗulɓitannde jeyngol ina poti yaltude he laaɗe baakuuje e nder maayo Potomac, ina njeynoo asamaan dow laamorgo ngoo.
Kono laaɓaani so tawii ndeen feere ene jogori laataade, sabu halfinaaɓe ndeenka e kisal ɓe njamirii yimɓe arnooɓe tawtoreede ɓee yo njaltu e nokku biyeteeɗo National Mall ko adii nde henndu mawndu ina waɗa. Yuɓɓinooɓe fijirde ndee ɓee kanum en mbiy ko ma ndirtin ɗum haa caggal waktuuji 9 jamma tawa henndu nduu deeƴtii. Trump kanum wiy ko hayso waktu 2ɓo jamma henndu nduu deeƴti maa ar waɗa haalannde mum.
Hay so tawii mawninde ñalɗi jeytaare ɗii ɓooyii wonde kewuuji ɗi ngonaa dawrugol, ko ñalawma mo Ameriknaaɓe fof ndentata mawnina jeytaare mum en ko aldaa e heedi-heeda dawrugol e lanndaaji ne, Hooreejo leydi ndii Donald Trump kanum ko piɓɗo waɗde ɗum no “Trump Rally” ɓurɗo mawnude he dente makko dawrugol e huwtoraade ngol mawnin-gol 250 ngam heblanaade suɓngooji “Midterm” hakkunde manndaa jogorɗi waɗde he lewru Jolal (Nowaamburu) payɗo o.
Hayso tawii Hooreejo Donald J. Trump ene yiɗi waɗtude ngol mawningol jey mum keeriiɗo ne, Ameriknaaɓe ɗaldaanimo heen, sabu kala ɗo njahɗaa he leydi ndi, yimɓe ɓee nana mawnina jeytaare mum 250 he sifaa mum en keeriiɗo.
