He laawol mum ummoraade Lonndon fayde New York, Makki Sal, hooreejo kiiɗɗo leydi Senegaal kadi ƴamoowo lefol ngardiigu fedde winndereyankeere, Yuɓɓo Ngootaagu Ngenndiiji, ƴaaŋii Ndakaaru ngam yiyondirde e Hooreejo leydi ndi Basiiru Jakaar Jomay Fay.
Caggal jaɓɓungal mawngal ngal o jaɓɓaa, o yiyondirii e hooreejo leydi o to galle laamorɗo ngenndi to. Nguu ɗoo njillu, ngu ene teskee ko kanum woni njillu makko arwaniingu gila o ummii he jappeere ngardiigu Senegaal, ko felo he ɗaɓɓugol ballal leydi Senegaal he yiɗde ardaade Yuɓɓo Ngootaagu Ngenndiiji.
Eɗen nganndi laamu Senegaal ene luutndinoo ndeen ɗaɓɓaande ngam luurondire dawrugol gonɗe hakkunde makko e lomtiiɓe mo ɓe, kono so nguuɗo njillu gasii laataade yaama tawata ko won jeewte les baɗaaɗe tawa ko diiwtooje ɗeen-ɗoon lure, lomtina ɗoon nanondiral.
Gargol gonnooɗo hooreejo leydi o, Makki Sal, to Dakaar ñalnde Aljumaa 17 Morso (sulyee) 2026, wonaa tan njillu calminaali e jokkere enɗam, kono ina jogii geɗe mawɗe to bannge peeje. He jokkondiral makko e hooreejo leydi jooni o, hono Basiiru Jomaay Fay, kanndidaa ONU o, ene yiɗi ƴellitde hurum mum he dow heedi-hedaaji lanndaaji dawrugol, e laawɗinde kandidaayagal mum. Ɗumɗoo ina hollira natal dowla Senegaal dentuɗo, mahiiɗo he wonki yuɓɓo republik tiiɗɗo wonannde ndaartintooɓe winndere ndee kala.
Ngam yiɗde ardaade fedde ɓurnde mawnude e winndere ndee, kanndidaa o ina foti heɓde jinngol e mawnin-gol leñol mum, hay so tawii noon ɗuum wonaa huunde himmunde e woote ɗee. Ballal dipolomasii ngenndiwal e mooɓondiral yimɓe ko kañum en ngoni sarɗiiji gadani ngam heɓde hoolaare e gite leyɗeele jeyaaɗe e Yuɓɓo Ngenndiiji Dentuɗi.
Mbeefeengu yimɓe yaltuɓe hanki he dow laabi Ndakaaru ngam arde jaɓɓaade mo nguu, ɗuum e jiyondiral makko e hooreejo leydi o to galle laamorɗo leydi to, ittaniimo gakkere mawnde aayɗinnoonde ñaantungal makko gila o ummanii ƴamde ngol ɗoo lefol.
Weltaare e eeraango APR he nguu njillu
He yiyannde lannda APR, yahdiiɓe hooreejo kiiɗo o Makki Sal; nguu-ɗoo njillu ko ɗum kewu ngenndiijo e dipolomaasi maantinɗo tigi rigi. Caggal lebbi keewɗi e kampaañ tiiɗɗo caggal leydi, diisnondire ɗe o waddi e leyɗeele terɗe ɗee kam e hohooɓe toowɓe e nder winndere ndee, gonnooɗo hooreejo leydi o, Macky Sall artude ɗum he leydi mum, ko ɗum faaro semmbinoowo ɗaɓɓaande makko ardaade ONU.
Makki Sal, e hono mbiyiri, “ko ɓiyɗo Senegaalnaajo, neɗɗo ngenndi, kadi ko dipolomaat.” Faayiida ɓurɗo mawnude oo noon he nguuɗoo njillu, ko jooɗodaade e hooreejo leydi o, Basiiru Jomaay Jaakaar Fay. Ɗuum ko huunde nde lannda APR jaɓɓii, kadi e ɓe mbeltanoo heen hooreejo leydi o, Basiiru Jomaay Fay, ngam faamde ɗum hol ko woni ngenndi e tooweendi makko republikyaagal. Ngam jaɓdemo rimɗinde hoore makko e heedi-heedaaji dawrugol addanii ngal ɗoo pottital hollirde dipolomaasi Senegaal e pellital mum e jaggande gooto e ɓiyɓe mum.
Teskagol ngol meeɗaa yiyeede wonande Senegaal e Afrik :
Hujjaaji ɗi wallitooɓe oonɗoo kanndidaa ngaddi ɗii, ina njahdi e politik nder leydi. Waɗde Senegaalnaajo e hoore fedde ɓurnde mawnude e winndere ndee, ina addana leydi ndii teddungal e doole keewɗe. E wiyde lannda Alliance pour la République (APR), hono ndee darnde ina waawi udditde dame jokkondire toowɗe he yuɓɓooji mawɗi ko wayno OMS, UNICEF, e PNUD, tawa ina newna jokkondiral teeŋtungal he ko yowitii he cellal, weeyo, e golle sukaaɓe e nder leydi Senegaal.
Wonande duunde Afrik, gargol Macky Sall maa won ko adii fof daartol wonande Afriknaaɓe haalooɓe Farayse, kadi maa yantu e mandaaji Boutros Boutros-Ghali (Misra) e Kofi Annan (Ganaa). Golle makko maantinɗe nde o woni hooreejo Dental Afrik (AU), teeŋti noon e naatgol fedde ndee e nder G20 e darnde makko tiiɗnde ngam haɓanaade ustude ñamaale Afrik, ina jogii teddungal mawngal e nder ballal dipolomaasi hakkunde leyɗeele.
Caggal ngaal kawrital ene tijjaa he ko fay arde maa laamu Senegaal hollir darned feeñde ngam wallitde kanndidaa hooreejo leydi mum kiiɗɗo o.
