Gine, hooreejo laamu hakkundeewu, Mamadi Dummbuya yahii hanki boowal laaɗe diwooje Ahmadu Seyku Tuure to Konakiri ngam jaɓɓoyaade ɓiyɓe leydi Gine ummitiiɓe toTunis. He haalannde nde laamu nguu yaltini, ene holla heen wonnde jahgol hooreejo leydi ndii, kanum e hoore mum, ngam jaɓɓoyaade Ginenaaɓe artuɓe ɓee ene hollira wonnde laamu nguu ene rewindii ngonka maɓɓe to Tunis gila nde tergal ɓurngal toowde he nder leydi Tunis liɓi konngol mum ngol nde.
Haalannde ndee teeŋtinii weltaare ɓiyɓe Ginenaaɓe ɓee sabu yiydeɓe laamu maɓɓe ene ari jaɓɓaadeɓe to boowal laaɗe diwooje to, hayso tawii e ɓe ngonndunoo he tampere e mette ngam no ngonka maɓɓe wayno to Tunis he ɓalɗe jawtuɗe ɗee ne, no ɓe njaɓɓoraa nii suynii mette maɓɓe, rokkiiɓe mbelemma artude he nder leydi maɓɓe.
Hooreejo laamu hakkundeewu o, Mamadi Dummbiyaa ene ardi he sate mawɗo kadi tawi ko toowɓe daraja e laamu he, ko wayno mawɗo jaagorɗe o, Dr Bernard Guma, jaagorɗo kadi koolaaɗo Kuuɓal, Kolonel Amara Kamara, e jaagorɗo kadi direkteer kabine, Jiba Jakite, wonndude e jaagorɗe goɗɗe e hooreeɓe konu. Oo ɗoo sate toowɗo, ene hollira wonnde ngonka Ginenaaɓe caggal leydi ko ngoƴa laamu nguu. Hooreejo feeñinii weltaare mum sabu gargol yimɓe ɓee ko aldaa e lorla, kadi o siftinii kadi wonde-mo naŋtiiɗo e miijooji jokkere enɗam hakkunde Afriknaaɓe (panafricanism), dente e ballondiral hakkunde leñɗi Afriknaaɓe, foti ko ɓaleeɓe walla raneeɓe. O mo joortii tan maa ngoon miijo won faamaago wonande kala ardiiɓe Afrik, mbele eɓe mbaawa waɗɗe Afrik mahanteeri ngootiri ndi feccotaako. O wiy “Sabu ko waɗi Tunis koo wonaa normaal kadi wonaa ko jaɓotoo he 2023, ɗo Aduna yahrata ɗo .”
