Colle Sow Ardo, so en mbinnidrii innde makko hono no woowiraa ni, ko dewbo Pullo mo innde mum yirlii he nder adunaaru hee kala sabu golle mum paayodinɗe he ñaaƴo e kettuki (manéquinénat et haute Couture/stylisme). Caggal nde o heɓi seedanfaagu to Institut de coupe et de Haute Couture de Paris, kadi o waɗi ñaaƴooji he nder Paris wuro anndiraango la capitale de la mode, kolle felliti artirde karallaagal mum to leydi mum Senegaal. Kettuki (haute couture) wonaa ñooti tan jooɗɗi, kono kadi ko ɗum ŋeeñal (art), wadde, he jiyanɗe Kolle Soh Arɗo, so ɓiyɗo Afriknaajo wonii kettoowo alaa e sago maale Afriknaaje njiyee heen, alaa e sago jeloode pinal Afrik tawee heen. Ko ndeen o felliti ƴettude gude cañaaɗe Afriknaaje e bagiiji mum en ngam huwtoraade ɗum he kettuki makko. Ko kanko adii waɗde ɗum he nder jookdu he haa hannde ɗum wontii ɓoornungal, wonaa tan Senegaalnaaɓe, kono rewɓe Afriknaaɓe he kuuɓal.
He 1983 Kolle sosi griffe hoore mum he nder Ndakaaru, tawi he ngaan saanga ko kanko tan waɗatnoo ɗum ɗoon. Hayso tawii hannde omo heewi ñemmbooɓe ne, sabu karallaagal e ñeeñal makko toowngal, kono kadi e moƴƴere makko nde alaa ko foti waɗi, yontaaɓe Senegaalnaaɓe e yimɓe mawɓe ɓee kala ko to makko ndoganta.
La Reine du Pagne Tissé, hono no o lolliri nii, jibinaa ko Njaarem (Diourbel) he nder Bawol, kono lasli mum ko Galoya, he nder reedu Fuuta. Golle makko ngaddaniimo yillaade ko ɓuri heewde e kapitaaluji Afrik haa e caggal jookdu ndu, hollirde kettuki makko he kawrite ñaaƴooji hakkunde leyɗeele.
Ko he 2003, caggal nde Maison Colle Sow Ardo dañi duuɓi noogaas,ngam mawnide ɗum o sosi kawrital hakkunde leyɗeele (international) ngal o inniri Sira Vision, kadi ndeen, e ngal jokki waɗde kala hitaande tawa ine tawtoree ɗum hettiyankooɓe Afrik dowrowɓe ko wayno Alphadi mo Nijeer, Bamondi mo Togo, Beitch Faro Gabon, Gilles Tuure mo Cote d’ivoire, walla kadi ko wayno Imane Ayissi mo Kamerun. Ngaal kawrital addanii sukaaɓe Afriknaaɓe heewɓe jogiiɓe ñeeñal e karallaagal mawngal he kettuki, anndeede e ƴellitaade he meccal kettuki.
He laaɓndal, hol ko jey sabaabu ɓamtaare makko, Kolle Soh Arɗo, jaabotoo tan ko wonnde ko duwaaw jibnaaɓe, e nehdi mum pulaagu.
