Hooreejo leydi Senegaal Makki Sal, he yaltannde mum he ayaawo haabrirde ngenndi, hollirii wonnde suɓngooji potnooɗi waɗde he 25 lewru Colte wonaandu nduu ɗii njowaama, kono o haalaani hol nde ɗe njogori waɗde.
He nder haala mum, hooreejo leydi o, hollirii wonnde gila ɓalɗe seeɗa luurondiral ene woni hakkunde suudu batirdu ngenndi ndu e Suudi diisnorndu doosɗe (conseil constitutionnel), tawdi kadi ko luurondiral ngal suuɗaaki, tawi saabii ɗum ko suɓaaɓe (sarɗiyankooɓe) suudu batirdu ngenndiɓee ene tuumi woon e terɗe Suudu diisnorndu doosɗe nduu selde laawol walla mbiyen waɗdude maalde e won e ƴamooɓe lefol hooraagu ɓe.
Suudu Batirdu nduu, hooreejo o wiy, sabu mum tuugnaade he jojjanɗe mum, ƴetti pellital he nder nanondiral mum en ñalnde 31 Siilo, sosde goomu losko sarɗiyankeewu ngam laɓɓinde hol no juurnitagol kanndidaa en ɓe e kala ko yowitii he suɓngo yahrata.
He haalannde mum ñalnde 29 Siilo 2024, doosɗeyankooɓe ɓee ndiiwtii kala tuumaaji pawaaɗi he dow mum en, kadi kollii fawaade he bongol ko ɓe tuumaa ko, maɓe mbaɗ feere fof mbele huunde ndee ene laaɓa haa wiya poy, tawa kadi ko he fawaade he dow hurumaade ɗoosɗe e kuule toɗɗiiɗe ceerndugol mbaawkaaji (séparation des pouvoirs) e kattanɗe kala tergal.
Hooreejo leydi o wiy, kaaɗoo ngonka e jiɓaade arii kadi yanti heen dukooji he ko yowitii he gooto e yiɗɓe ƴamde lefol hooraagu leydi ndi, jiytaaɗo wonnde ene jogii ɗerewol jeyeende he leyɗeele ɗiɗi ceertuɗe, te ɗuum yiytaa ko caggal nde suudu doosɗeyeewu nduu saakti doggol yimɓe noogaas jaɓanaaɓe ene mbaawi ƴamde lefol ngol; tawii ɗuum ene yaɓɓi kuulal 28 doosɗe leydi ndii biyngal “ kala mo ene ƴama lefol hooraagu leydi ndi, ko alaa e sago tawa o jogii ko ɗerewol jeyeende Senegaal tan”.
Kaan ngonaka, hooreejo o wiy, ene waawi bonnude hoolaare he suɓngooji he, awaa pooɗee-nduureeji e ñaawooje gila ko adii suɓngooji ɗi haa he caggal suɓngooji ɗi.
Leydi ndii ene waɗi haa jooni, gaanooɗe ɗe seppooji neegɗi baɗnooɗi he lewru Mbooy 2021 e Korse 2023, ngoppi e mum suwaa sellude, nde ke noon leydi men waawaa jaɓde dillere wonnde kadi.
Makki Sal holliri, sabu makko wonde hooreejo leydi ndi, mo ene fawii he dow balabe mum, deen’gol fooccaare mahannteeri yuɓɓo ngo e ceerndugol mbaawkaaji ɗii, ko feere alaa so wonaa so baasi yanii hakkunde mbaawkaaji ɗiɗi ɗii, sarɗinyankooɓe e ñaawooɓe, ko maa o yanta heen.
“He dow kaaɗoo ngonka, Batirdu ngenndi ndu, fawaade he jojjanɗe mum, ɗaɓɓiriikam yiyannde, tuugnaade he kuule mum nder-nderiije, kuulal doosɗeyeewal he ko yaaccii, ngam ittitinde ko lelnaa he kuulal 31 he doosɗe ɗe ngal. Mi nananiiɓe ndeen ɗaɓɓaande, caggal nde ndiisnondirmi e Hooreejo Batirdu ngenndi o, Mawɗo jaagorɗe o, Hooreejo HCCT (Haut Conseil des Collectvites territoriales), Hooreejo Diisnordu Faggudu, renndo e taariindi , e Hooreejo Suudu diisnordu doosɗe.” Hooreejo leydi wiy. Ko tuugnaade mo he ɗuum addanimo siifde dekkere mo tonngoode 2024-106 ñalnde 3 Colte mo ene firta dekkere mo tonngoode 2023-2283 ñalnde 29 Jolal jamirnooɗo noddugol yuɓɓo suɓngooji o.
So en paami wadde, kulaal tuugnorngal baɗgol suɓngooji ɗii he nder lewru Colte, ndu ngonɗen nduu, ngaal kuulal nuskaama.
Hooreejo leydi o, ngam yiɗde hoolnude ɓiyɓe leydi ndii e deeƴnude hakkillaaji mum en e woon he nannanti, o siftinii wonnde omo heddii he fodoore makko o wonaa jeyeteeɗo he ƴamooɓe lefol ɓe.
He joofnirde o wiy, maa o noddu kaaldigal ngenndi udditiingal, ngam mbele maa suɓngooji bellitiiɗi, leerɗi, kadi ɗi ngala laŋkere,mbaaw laataade tawa ko he nder Senegaal jam-yamo.
