Hooreejo leydi Senegaal, Makki Sal ene jokki hujjinaade he dirtinagol lajal suɓngooji hooraagu leydi Senegaal, potnooɗi waɗde ñalnde 25 lewru Colte ndu ngonɗen ndu, he tuma nde seppooji e iiñcuri ene kawridini wertaango leydi ndi.
He joɗnde naamnal e jaabawol nde o waɗdi e jaayndiyankooɓe AP (Associated Press), hooreejo leydi o fuuykinii haalaluuji ɓeen wiyooɓe ko o waɗi koo ene luutndi ɗoosɗe (constitution) leydi ndi, walla wonnde maa ɗuum jibin luurondiral ɗosɗe. O wiy leydi ndii ene hatojini e sahaa seeɗe ngam waawde laɓɓitinde sabaabuuji gaddanɗi ɓe kanndidaaji mum en ndiiwtaa ɓe ko ɗi ndiiwtiraa, kadi luural janngal hakkunde cate laamuguu ɗiɗi woni sarɗiyankooɓe ɓee e ñaawooɓe ɓee no safriraa.
Hayso tawii ko ɓuri heewde leydi ndii ene tuumi hooreejo leydi o, mo daawal mum ene fotnoo timmude ñalnde 2 Seeɗto, yiɗde ŋottilaade he laamu ne, Makki kanum riiwtii ɗiin kulhuli. Sabu o wiy, “Mi ɗaɓɓaani hay huunde ko wonaa woppude leydi ndii he jam e deeƴre. Miɗo heɓlaani tottide jappeere ndee, kadi ko huunde nde kebaninoomi.”
He saanga nde mawɗo leydi o, yeewtidta e jaayndiyankooɓe AP to nder galle laamorɗo too ndee, he nder boli Ndakaaru e yoga e gure tappamaaje leydi ndi tawi ko yimɓe ene mbaɗa seppooji, ene duppa ponooje, ene mberloo kaaƴe ngam hollirde mettere mum en he feere nde hooreejo leydi o ƴetti ndee.
Senegaal ene jogitiraa he nder Hiirnaange Afrik, no leydi ɗo demokaraasi ɓuri fuɗde e jaalaade, kono pooɗee-nduureeji hakkunde laamu nguu e lunndiyankooɓe ɓee, teeŋti he lannda Pastef e hooreejo mum Usmaan Sonko, ene addani yimɓe heewɓe he nder aduna o rewindotooɓe dawrugol Senegaal wiyde demokaraasi ene yahri caggal he leydi hee ɗii duuɓi ɗiɗi jawtuɗi. Ko ene eɓeynee he 1000 neɗɗo ene he nder dummbirɗe tawi jey sabaau mum ko jiyanɗe mum en to bannge dawrugol. Ene jeyaa e ɓeen Usmaan Sonko, lunndiyanke ɓurɗo dowlude o, e cukko mum Basiiru Jomay Fay, mo diisnordu doosɗe jaɓanno kanndidaayaagal he suɓngooji Colte 2024.
