Waasde mi joɗɗineede he golle am wonaa ko ɓuri himmude, ko konnguɗi ɗi Sammba Njaay haali tuma nde o haaldatnoo e jaayndiyankooɓe rfm. Hooreejo Yiilirde Ngenndiire (Pca) Sosiyatee ngenndiijo ngam koɗkiiji ɗi kasdi newiindi (Sn-Hlm), Sammba Njaay, toɗɗaaɗo e lewru Yarkomaa (oktoobar) 2024, haa jooni joɗɗinaaka he golle mum sabu ŋakkeende yamiroore siynaande.
Bismanooɗo to Rfm, gonnooɗo Dirikteer général Grands Trains du Sénégal he sahaa laamu Macky Sall oo, tabitinii wonnde o ƴettaaani golle makko tawo caggal nde hooreejo leydi o, Basiiru Jomay Fay ɓami pellital ngam ardinde-mo Sn-Hlm. Kono Sammba Njaay wayi ko hono no jaɓruɗo alla ene jebbilii ni. O wiyi “Senegaal ɓuri kala ligey. Miin ko mi ɓiyleydi jokkoowo gollaade ngam ɓamtaare Senegaal. “Waasde mi ƴettude ngal ɗoo gollal wonaa ko ɓuri himmude”.
Ɗii konnguɗi noon ina ceerti e ɗi o haalnoo he lewru Mbooy (marse) ɓennundu nduu he 7TV. E nder ndeen ɗoon jaaynde, Sammba Njaay wiyi ko naamnitii-ma dekere toɗɗagol mum haa tampi. “Mi nanii he jaayndeeji he kalfinaaɗo konngol laamu nguu ina haala ngonka ka, kono e sahaa gooto mi etinooma jokkondirde e maɓɓe ngam humpitaade hol no ngonka ndeeɗoo dekere woniri. “Mi wi’aama ɗum yaltaani tawo”, o habri. Nde o jokki haala makko o wiyi: “ Rewam dawrugol (La conséquence politique) ɗam mbaawmi ƴettude heen woni tan ko wonde ko mi tergal he nder mooɓal “Jomaay ngam Hooraagu” gonngal sabaabu Jomay heɓde hooraagu leydi ndi. Yimɓe ɓee fof ene nganndi ɗuum, kadi dalilaaji mum nana ɗoon.” E nder ndeeɗoo yaltannde, o arti he darnde makko he nder ngaal mooɓal . “Miɗo tawtortenoo batuuji ɗii, mi wallitii, kadi miɗo jogii junngo he laamu .” O wiyi, “hay gooto waawaa ittude ɗum e am.”
Ngam siftinde tan, terɗe lannda Pastef keewɗe ceyfitiino nomegol Mr Njaay sabu omo jeyanoo e yimɓe biskitatnooɓe ɓe. He kuccital mum e jaayndeeji, caggal nde o toɗɗaa, Basiiru Jomay Fay wiyi geɗe ɗee fotaani yiyreede hono noon. O siftinii wonde ko o hooreejo Senegaalnaaɓe fof, Mr. Faye ina jaɓani terɗe lannda mum jojjannde waasde yahdude e won peeje ɗe o ƴettata.
To bannge hoore mum, Usmaan Sonko hooreejo lannda Pastef, nde gulaali ɗii keewi caggal ngool nomegol, o wiyno wonnde “ma peeje ƴette ko leelaani ngam saataade ɗuum ko waɗaa.” O anndi nii kadi hooreejo leydi o Jomay, ƴettuɗo ngaal pellital sikke ala, tawi waɗi ɗum ko he dow sakkitoore won eyahdiiɓe, “anndaano hay huunde e golle gonɗe e ñiŋeede ɗe.” He yaltannde wonnde, Usmaan Sonko artii kadi e haala he, o teeŋtinii wonnde woytaandu nduu safraama, sabu hay ɗerewol gootol siifanooka.
Wadde mbiyen tan nomeede Sammba Njaay pca ngam ardaade Sn-Hlm so haaytaani ne, iwaani tawo he kaayaa-mbeeya.
