Hay so woote ɗee timmiri ko he daawal tataɓal, kanndidaa Moritaninaajo oo toɗɗaama hooreejo BAD (Banque Africaine de Développement) ɗuum waɗi ko caggal hojomaaji seeɗa tan jooni to Abijaan ! Siidi Ould Tah toɗɗaama caggal nde o heɓi ko ɓuri heewde e toɓɓeɗe, 76% e woote ɗe, tawi Zammbinaajo Samuel Munzele Maimbo gonnooɗo hooree he daawal gadanal o ( o dañnoo ndeen ko 40,41%) wonti ɗiɗaɓo, o dañi 20,26% Senegaalnaajo o, Amadou Hott kanum dañi tan ko 3,55%. Ko limre ɓuuɓnde, kono nde cooynino-ɗen ina ara, so en ƴeewii no leydi Muritani waɗtiri heen tiiɗnaare mun ngam tabitinde kanndidaa mum ni.
Wonande kanndidaa Senegaalnaajo o Aamadu Hott, ellee yaakaare mum ɓurnoo mawnude ko he wonde mo ganndaaɗo he nder fagguduyankooɓe walla mbiyen ngaluyankooɓe, sabu karallaagal makko maantinngal he oon ɗoon fannu, ko ɗuum waɗi maataaw o ɗaɓɓaani ballal leydi makko e jinngol tiiɗngol ummoraade he laamu ngu, walla so o ɗaɓɓiine tawo o heɓaani no haaniri ni. Sabu hoɗdiɓe Senegaal, anndiranooɓe wonde sehilaaɓe mum tawtoranooɓe ɓee fof kollitii pellital mum ko wallude kanndidaa leydi Muritani mo wonaa tergal CEDEAO, wonaa tergal UEMOA. Hol ko saabii ɗuum ? Eɗen ciftina tan, Aamadu Hot ko jaagorɗo wonno he laamu Makki Sal.
