Caggal ñalawma keewɗo dillere he nder wertaango leydi Senegaal hee fof, ñande Njeslaare,tawi saabii ɗuum ko seppooji yimɓe YEW, walla mbiyen yiɗɓe Usmaan Sonko. Ñalande Naasaande hooreejo lannda Pastef o nootitoyinooma noddaandu ñaawoowo o, haysinno ko he dow waawnere. Sabu ko alkaateeɓe towimo haa o toowi mbuttiyimo tirbinaal, kono ñaawoore nde waɗaani, yowaama kadi haa ñalnde 30 Mbooy. Hooreejo lannda Pastef e danndikinantooɓe ɗum kujjinoriima rafi cellel. O hootiri kadi hono no o ardunoo, ɗuum woni he juuɗe semmbe tamnaaɗo ndeenka deeƴre. Kono caggal nde o naatti galle makko, mawɗo lannda Pastef e takkiiɓe ɗum njiɗii o yaha suudu safrordu (clinique) he sara leegal makko ɗoo kono hay yimɓe SUMA Assistance ndonku naatde galle makko ɗo adan ɗoo, nde tawnoo gila hecci-hanki, eɗen nganndi, dadiiɓe ɓee ko udduɓe galle makko, haygooto naatataa kadi hy gooto yaltataa. Ko caggal nde mawɗo Pastef o werlii eeraango he nder resooji-renndo, nde ɓe puɗɗii jaɓde Ambulance SUMA Assistance ari ƴettimo.
He nder winndanndeTwitter, hanki 16 Mbooy, lunndiyanke o wiyi: “Gila nde FDS ngartirimi galle am miɗo wonndi he jiilol cattungol, reedu am kadi ene muusa sanne, miɗo daña caɗeele foofde. Min noddii SUMA Assistance, kono Polis nana faddii ambulance maɓɓe rond-point too, ene salii ɓe njettoo galle am. Makki Sal nana fewja no wordimi hono no o waɗiri ɗuum lawbi ɗi limotaako”.
Eɗen ciftora ko gila to tirbinaal too taariiɓe mo ɓee puɗɗinoo wiyde wonnde won ɓakdi alkaateeɓe ɓee mberlii he makko, ɗuum saabii omo hatojini e yoyde doktoor (ñawndoowo).
