Mammadu Su’aybu Bah, ɓurɗo lollirde innde mum naalanke “Maxim BK” ene jeyaa e yimooɓe Afriknaaɓe sappo suɓaaɓe ngam jeyeede he kawgel Prix Découvert RFI 2023.
Mammadu Su’aybu Bah ko suka pullo Ginenaajo jimoowo Rap, omo yima he ɗemngal Farayse kono ko neeniwal makko Pulaar o ɓuri heewde yimde. “ Ɓe lanndino min yo min naɓanɓe gimi (jimɗi) gimi ɗi mi naɓi ɗin ko gimi ɗi mi hooli, ko gimi Pulaar kadi min naɓi. Miɗo anndi haysinno oon tigi nanataa Pulaar so o jentike (heɗiima) o waawat yiɗude ɗi . Ɓe jentii tan ɓe wiy ɓe tawnii lan (am) e nder sappooɓe ɓurɓe lollude.” Ɗum ko jaabawol ngol o rokki nde o laaɓndaa he faandu RFI Fulfulde.
Maxim BK e sukaaɓe wayɓe no mum ene ɓeydi hannde lollinde ɗemngal Pulaar sabu ko ɓe ngoni naalankooɓe ŋanaa kadi faarnortooɓe, ñaaƴirooɓe ɗemngal Pulaar, tawi kadi jimɗi maɓɓe ene keɗee he adunaaru Allah ndu kala. Kono sabu yiyannde nde Fulɓe keddi jogaade he ɗeen mecce (golle) so yerondiraama e pinal e adaaji Pulaagu, yanti kadi e yiyannde diine nde, yoga e ɓeen naalankooɓe Fulɓe walla ko wayno magiyankooɓe ene ndaña caɗeele he koreeji (babbdiraaɓe) mum en waawde walitde ɗum en e suusnude ɗum en jokkude ɗeen golle ɗe cuɓii fannoraade. Maxim BK wooraani ɗeen caɗeele. O wiy nde o fuɗɗotoo yimde he 2013 ndee tawi ko omo woni tolno Bac, kono o suuɗotono baaba makko. Nde tawnoo oon yiɗaano o wona gimoowo, kono caggal nde gimɗi makko puɗɗii lollude haa ɗi mbaɗti faweede he rajooji, baaba makko heɗii anndi o soobiima he ɗuum hankadi. Oon wiymo ma woppidmo he yiɗde makko nde kono ma o fodana ɗum geɗe tati, wonnde omo reeno simme, yarde sanngara, kadi omo jokka jaŋde makko haa o heɓa seedanfaagu makko.
He nder rap Pulaar he kuuɓal, Lagine haa ɓuri teeŋtude, Maxim BK ko jaalal tiiɗngal. Gimɗi (jimɗi) makko fof ngabbitii ko he nguurndam e caɗeele renndo, ko wayno rafi nuunɗal e ñaawoore goonga he nder renndooji Afrik e kuuɓal Lagine haa ɓuri teeŋtude. Kono kadi caɗeele faggude e rafi (anngal) golle, e baylagol jikkuuji.
