Kanndidaa lannda PDS, Karim Wadda, jolnii ɗaɓɓaande mum to gerefee mo goomu doosɗeyankeewu (conseil constitutionnel), Ko kanko Karim Wadda e hoore makko feññini onn kabaaru he ɗerewol makko facebook.
“Miɗo weytii e habrude on wonnde ɗaɓɓaande am ngam jeyeede e ƴamooɓe lefol laamu Senegaal he suɓngooji Colte 2024, naatnaama hannde to goomu ɗoosɗeyankeewu. Ko ɗum taaɓannde woɗnde, ndenten ngam Senegaal moƴƴo janngo.”
O lunndiyanke, Karim Wadda, jahroowo he duuɓi 55, ko ɓiy laamɗo Senegaal kiiɗɗo, Me Abdullaay Wadda, gardinooɗo Senegaal 2000-2012. Kadi kanko Karim o ardinooma jaagorɗe keewɗe he sahaa nde baaba makko woni he hoore leydi ndi. He 2015, o ñaawaa ngam sokeede duuɓi 6, sabu faggitoraade ngalu no laaɓaani (ene woori sariya). Caggal nde o sokaa fotde duuɓi tati, hooreejo leydi Senegaal, Makki Sal, yaafiimo he 2016. Gila ndeen ko o dogɗo omo mooloyii Kattar. Ko ndeen sokenoode haɗnoomo waawde jeyeede he suɓngooji hooraagu Senegaal he 2019.
Ko caggal jeewtidal ngenndiwal jooɗinoongal he lewru Juko yawtundu nduu, denndinnoongal laamu Senegaal, lanndaaji lunndo keewɗi e pelle ɓiyngu leydaagu, suudu sarɗiji Senegaal yawtini kuulal dokkitngal mo jojjannde makko waawde fooɗanaade hooraagu leydi Senegaal, kanko e lunndiyanke goɗɗo, kanum ne cokanooɗo ngam takkeede ñaamii ngalu leydi, woni Kaliifa Abaabakar Sal, gonnooɗo meer mo saare Ndakaaru. Oon kanum ne pawanooɗo junngo gila 2017, ñaawaa sokeede duuɓi joy, kono kadi Makki Sal yaafii ɗum he 2019.
Ɓee ɗoo takkanooɓe mbaariima booñuuji renndo njuppi e jiifaaji mum en, te laɓɓinaani heen koye mum en, ko kanum en kadi pooɗantoo resndeede ndiin leydi e aynude ngaluuji mum. Ko ɓuri haawnaade fof noon kadi ko kamɓe ɗiɗo ngoni lunndiyankooɓe ɓurɓe heewde jinnganooɓe, so ɓenni Usmaan Sonko, mo jeyegol mum he suɓngooji paydi ɗii anndaaka tawo mbele maa laato.
