Ko ñalnde Njeslaare (Alaraba) 15 Duujal (Mai), to Galle Pinal Douta Seck, naalanke rappoor Pulaar lollirɗo Safaray o buumti album mum keso pull mo tiitoonde mum woni “Fongo e Fongo”, he tawtoreede yiɗɓe e sehilaaɓe, kono kadi fans en ummiiɓe to woɗɗi ngam arde hawrude he oon ñalawma.
To Galle Pinal Duta Sek, naalanke o hollirii toon album mum keso o “Fongo e Fongo”, album mo 15 tiitoonde (jimol) kono kadi o ruttinii tawtoranooɓe ɓee caggal seeɗa gila he puɗɗorɗe makko, wonndude e daande welnde kam e gaaci Fulɓe cañiraaɗi kesam-hesaagu. Sahaaji belɗi beytorteeɗi, gila ene daggi-dagginee koyɗe cuwaano tiiɗde haa hannde mo o wonti hoodere jaayre he nder rap Pulaar, rap Galsen, walla nii mbiyen tan rap Afrik he kuuɓal. Kono kadi o siftinii ñalawmaaji jurminiiɗi ciftinooji baasal yumma jibinnooɗo, reeniri korsa e giɗgol, mo jaaroore makko he mum alaa ɗo haaɗi.
Naalanke o yejjitaani kadi naalankooɓe woɗɓe ɓe o gollidii gila nde o ummii o naati he naalankaagal, kam e njilluuji makko e njiilawuuji makko ɗi o waɗi caggal leydi he nokkuuji keewɗi ɗi o heɓi fijoyde, e lomtaade naalankooɓe Fulɓe he nder winndere he. Oon ñalawma jaltingol album o suɗiraama tawtoreede naalankooɓe Haalpulaar’en heewɓe, jaayndiyankooɓe e ngenndiyankooɓe daraniiɓe pinal Afrik, kono kadi daraniiɓe ɓamtaare ɗemngal Pulaar he kala fannu. Ñalawma o suɗoraama kadi tawtoreede rappoor en mawɓe ko wyno Xuman, gooto e fuɗɗuɓe dillere Hip Hop Galsen, mo ngannduɗaa ko sehel mum Safaray.
Yaltini album o ko label Farba Evens mo Baya Sek. Album Fongo e Fongo, sikke alaa ene fay lollude, yeewtude gure tappamaaje e jeereeji, kono kadi maa oolel mum nanoye haa daande maayo to o jogori waɗtoyeede daaɗe jaɓ-jaɓtondiral hakkunde fonngo worgo maayo e fonngo rewo maayo, ɗo mayo wonaa keerol.
