Guinée : Ñalɗi defte sukaaɓe ɗi Edition Ganndal yuɓɓinatnoo to Konaakiri joofi hannde.

Salon winndereyankeejo defte sukaaɓe maa joofnu golle mum hannde Hoore-biir 11 Jolal, caggal nde ɗe puɗɗaa to Konaakiri laamorgo leydi Lagine, gila ñalnde Njeslaare (Alarba) 8 Jolal. Ko ɗum kawrital ɓurngal mawnude baɗngal he nder leydi Lagine he maayirɗe ndee ɗoo hitaande, teeŋti he ko yowitii e bannge pinal e ganndal.

He nder ɗeeɗoo balɗe nay keertinanaaɗe defte sukaaɓe, geɗe keewɗe mbaɗaama heen, ko wayno wejooji e njeeygu defte sukaaɓe, teddinirde-siifannde (dédicace) tiitooɗe kese, jeewte he ko yowitii e coñce, jonɗe tinndi he nder duɗe saare nde kanum e nokkuuji keertoraaɗi salon o. Ene jeyaa heen kadi, mbaylaaji ngam ekkitde wallifiyankooɓe defte sukaaɓe he ɗemɗe ngenndiije (neenewiije).

He nder jaabowooli mum laaɓnde africaguinee.com, Aliw Soh, hooreejo Edition Ganndal, tonngii sabaabuuji kawrital ngal he toɓɓe tati:

  • Ko hollirde ballifanɗe ngenndiije defte sukaaɓe e nafoore mum to bannge nehdi
  • Hirjinde sukaaɓe Laginenaaɓe e yiɗde defte kadi e woownude ɗum en taraade
  • Wallude sukaaɓe Laginenaaɓe taratooɓe he dañde fartaŋŋe waawde heɓde defte ceertuɗe jahduɗe he tolnooji maɓɓe e muuyooji maɓɓe, tawa kadi ko iwruɗe bannge kala he nder wertaango leyɗeele kaalooje ɗemngal Farayseere (Espace Francophone).

Ko wonaa ɗuum kadi joljole ɗee ene yahdi e kawtal winndereyeewal he ko yowitii he ɗiɗewaagal (Colloque international sur le bilinguisme) he nder defte sukaaɓe tawa ene toɗɗii fanniyankooɓe e haralleeɓe iwruɓe he leyɗeele Afrik keewɗe, ko wayno jannginooɓe, wiɗtooɓe, pelle winndereyankooje kaɓanteeɗe nehdi ɗiɗewaagal (education bilingue), Farayse/ɗemngal ngenndiwal Afrik, pelle daraniiɗe jaŋde mawɓe (alphabitisation) fof maa kawritii he nder lulnde balɗe ɗiɗi tuggude ñalnde 8 haa 9 Jolal 2023.

He nder ɗeen balɗe kadi, ma galleeji muulngo keewɗi njaltin tiitooɗe mum en kese, tawa ko ndeen woni laawol mum en gadanol waawde yettaade juuɗe taratooɓe. Edition Ganndal mo Ceerno Aliw Soh, hollirii maa yaltin defte mum en tawa ko he fannu Barille, ɗuum woni defte keblanaaɗe wumɓe tawa ko he memirde juuɗe njanngortoo.

admin

admin

Leave a Reply

Your email address will not be published. Required fields are marked *