Winndiyanke leydi Kenya biyeteeɗo Ngũgĩ wa Thiong’o, ganndo mawɗo he nder binndol Afrik hannde, maayii tawi omo yahra he duuɓi 87, ko ɗum BBC holliti ñalnde alarba. Oo gorko, baɗnooɗo nguurndam mum e winndude waylo-waylo leydi mum e daranaade binndol e ɗemɗe Afrik, ina ɗacci golle maantiniiɗe, ɗe o gollii ko ene yaha he duuɓi capanɗe jeegom.
O Jibinaa ko he hitaande 1938, o innaa James Thiong’o Ngũgĩ sahaa nde Kenya woni he les njiimaandi koloñaal Angalteer, winndiyanke o mawni ko to Limuru e nder galle mawɗo ɓesnuɗo, remooɓe ɓe ngonaano yaajaaɓe. Jibnaaɓe makko ene ndentina ɓuuɗel e ɓuuɗel ngam yoɓande mo jaŋde makko to Alliance, duɗal ngal misiyoneer en Angalteernaaɓe ngardinoo, e wiyde jaaynde BBC.
E hitaande 1959, Ngũgĩ ummii leydi Keñiya ngam janngude to duɗal jaaɓi haaɗtirde Makerere to Uganndaa, haa jooni ina jeyaa e duɗe jaaɓi haaɗtirde ɓurɗe maantinde e Afrik. Ko ɗoon golle makko binndol puɗɗii. E nder batu winndooɓe, o holli binndol deftere makko adannde nde binndoowo dowrowo kadi kurmaaɗo he nder winndiyankooɓe mo leydi Najeriya biyeteeɗo Chinua Achebe.
Achebe totti deftere ndee muuloowo mum to leydi Agalteer, nden deftere nde tiitoonde mum he ɗemngal Engele woni: “Weep Not, Child,” (Hoto woy Cukayel) yaltii he 1964 tawi e nde heɓi manoore ummoraade e saatotonooɓe. Ko kayre woni deftere mawnde arannde nde Afriknaajo fuunaange winndi he nder ɗemngal Engeleere”, e hono BBC wiyiri.
Hitaande 1977 ko hitaande mbayliigu, Ɓooraade e Hunaade
Hitaande 1977 ko hitaande mbayliigu he nder nguurndam makko. Ngũgĩ acci innde jibinannde mum James ngam wontude “Ngũgĩ wa Thiong’o” sabu o wiy o yiɗnoo ko innde nde ala hay batte goote koloñaal. O acci kadi ɗemngal Engele ngam wonde ɗemngal makko gadanal ngal huutortoo he binndol makko, o hunii wonnde ko heddii heen ko o winndata tan ko e ɗemngal Kikuyu, ɗemngal makko neeniwal”, BBC ina fammina.
Deftere makko sakkitiinde e ɗemngal Engele, “Petals of Blood”, (Piindi ƴiiyam) yaltunde e ndeen hitaande, kadi ina maantiniri mbayliigu politik. Hayso tawii defte makko ɓennuɗe ɗe omo ñiŋatnoo dowla koloñaal, he ndee ɗoo deftere o feewtini ñiŋooje makko ko he dawriyankooɓe Kenya caggal jeytaare, ɓe o sifoori heen ardiiɓe jamfiiɓe Kenyanaaɓe doofolɓe.
O haaɗaani ɗoon tan, kono kadi e ballondiral goɗɗo, ɓe mbinndi tiyaataar mo tiitoonde mum ko “Ngaahika Ndeenda” (Mami res kala nde njiɗmi) tawii fayndaare mum wonno ko hollirde ndaarannde bonnde nde ɗeewatnoo dawriyankooɓe Kenya.
Kono ɗiin tiyaataaruuji kaɗaa fijeede, kadi o nanngaa o werlaa he dummbirdu hakke hitaande o ñaawaaka, he sahaa Jomo Kenyata. Kono ndeen hitaande wonaa tan waasaande kono hakkille makko fiindi haa wufti, sabu ko ndeen “Ngũgĩ winndi deftere mum adannde e ɗemngal Kikuyu, “Devil on the Cross,” e nder kasoo. Ina wiyee o huutoriima kaayitaaji toilet ngam winndude deftere ndee fof, nde tawnoo o alaano kaayitaaji”, e wiyde BBC.
Hee denndaangal nguurndam mum, Ngũgĩ waɗi hare mum ko haɓaade pewje semmbeeji koloñaal en he nder Afrik kam e waasde nuunɗal e kiram laamɓe Afrik e dawriyankooɓe mum. Ndeen hare omo sawndondiri ɗum e darnde makko ngam ɓamtude e ƴellitde binndol he ɗemɗe Afriknaaje. Ko ndeen darnde e ngool biskitgol laamɓe Afrik e dawriyankooɓe mum addanimo wonde mooliiɗo hakke duuɓi 22 to Angalteer caggal ɗuum to Amerik to wonno janngiwoo he duɗe jaaɓihaaɗtirde Yale, New York e California Irvine.
He nder winnande makko wootere nde tiitoonde mum woni rimɗinde walla jeytaare hakkille “Decolonising the Mind”, omo laaɓndoo : Hol ko seerndi dawriyanke biyoowo Afrik waawantaa hoore mum so wona imperialism tawa, e wallifiyanke biyoowo Afrik waawa waɗde hay huunde so wonaa he ɗemɗe Oropnaaje?
Ngũgĩ wa Thiong’o ko gooto e jaale Afrik mo daartol ndimaagu Afrik yejjittaa, sabu darnde makko yoo Afrik yowito e hoore mum, tamana hoore mum kuccam mum e janngo ɓesngu, itta geƴƴelle fenaande ɗe hakkille mum sokaara. Heɓta ndimaagu mum timmugu e neɗɗaagal; ƴellita pine mum e ɗemɗe mum.
