Seneraal gonɗo he fooftere (alateret) Meysa Sellé Njaay, gonnooɗo balloowo (aide de camp) hooreejo leydi Macky Sall, yaltinii noddaango ngam jeertinde, ñalnde Dewo-hoorebiir 22 Seeɗto, ngam haɓaade kulhuli jihaadiyaŋkooɓe e keeri leydi ndii e ɓeydagol semmbeeji cuuɗiiɗi he nder leydi ndii. O haalnoo ɗuum ko he joɗnde ngam udditgol duɗal tolno hakkundeejo (lycée) Koki to diiwaal Luga, ngal o innitiraa. Haala kaa kadi wonnoo tan ko jeertinoore faawaade he kulhuli carogol pelle jihaadiyankooɓe he nder Sahel, « hay gooto suraaki he majjum » o wiyi kanko bees kadi balloowo hooreejo leydi kiiɗɗo, o.
Kanko bees o owiyi, omo woƴaa no feewi he ƴellitagol ɗoo Islaam “Jiggaaɗo” tawi noddooɓe he mum ɓe ko waajotooɓe hebloyaaɓe caggal leydi, te baɗle mum en ɗee ene luutondiri he Lislaam suufiyanke gaadanteejo goowaaɗo ɗoo he Senegaal o.
Omo reentina he ko o noddiri “ maale taƴagol jiitiniiɗe”, he yeru, woon he ɓeen waajotooɓe saliiɓe geɗeeji aada renndo, ko wayno wirwirnde, innɗe, kadi joom mum en nootittaako he ballondire (jokkere enɗam) renndo. Kanko bees gonɗe he alateret o, o wiyi “ ene haani yimɓe ɓee laaɓnditoo koye mum en, hol tinndinooje ɗe ɓe njannginta to duɗe too, hol nehdi ɓe nehata toon sukaaɓe ɓee kono kadi holto ɓe ƴettata ngaluuji maɓɓe ɗi ɓe kuutortoo ɗii.” O ɓeydi heen nii wonnde woon heen e “pelle wallitta ɗum en ko pelle waɗboniyankeeje ɗe juuɗe mum en ene moddi he njeeygu dorog (ɗaaynooje) kam e biiftotooɓe yimɓe -nanngooɓe otaas.”
Kanko bees o, Meysa Selle Njaay, o eeriima laamu nguu nde mbaɗata wonnde kulhuli jogaaɗi to bannge ndeenka leydi ndii ko huunde nde fotaani yeebeede. Kadi ballondiral ene foti wonde hakkunde semmbeeji ndeenka e kisal ɗii e ɓesnguuji ɗi.
