Renndo juulɓe leydi Senegaal mawninii juulde taaske hannde 7 lewru Korse hitaande 2025, he nder leydi ndi fof. To jumaa Seyku Umar al-Fuutiyyu Taal to Dakaar, ardiiɓe diine e dawrugol heewɓe tawtoraama pummungal juulde nde.Ene jeyaa heen Aamadu Bah, gonnooɗo hooreejo jaagorɓe, kadi mawɗo lunndiyankooɓe Senegaal.
E joofnirde golle ɗee, Ceerno Seydu Nuuru Taal, Almaami Juulirde Seyku Umar, waɗii waaju tawi koko yowitii he fotde hakkunde baaba e ɓiyɗo.
Diine oo teeŋtinii jikkuuji ɗi ɓiɗɗo foti jogaade he baaba mum, o siftinii heen, nafoore ɗooftaare e teddungal jowitiingal e jibnaaɓe, tawa ina yahdi e tinndinooje lislaam e nafooje pinal Senegaal.
Ko fayti he geɗe ngenndiije hannde, Imaam Seydu Nuuru Taal weltiima he laamu ngu ngam pellital mum noddude he kaaldigal ngenndiwal. O hirjini ngool laawol, o siftini kadi ngool laawol (kaaldigal e diisnondiral) ene yahdi he tinndinooje diine. Kono o eeriima nde ɗeen diisnondire mbaasata haaɗneede tan hakkunde dawriyankooɓe e yimɓe laamuuji, kono yo ɗe mbaɗtortu heen ɓesngu nguu fof, ngam ha ɓe mbaawa heɗtaade jiyanɗe ɓiyɓe leydi ndii kala e miijooji mum ko fayti he ko nawrata leydi ndii yeso.
